Ukiuunerani tuttunniarnissamik naalakkersuisoq ammaassivoq
Sapaatip akunnerini pingasuni inuussutissarsiutigalugu piniartutut allagartalinnut, piffissami februaarip 17-ianiit marsip qulinga ilanngullugu aqutsiveqarfinni ukunani ukiuunerani tuttunniartoqassasoq naalakkersuisoq aalajangerpoq:
- Ammasumik Nuussuup qeqertaasaani (aqutsiveqarfik 8)
- tuttut 100-t Naternami (aqutsiveqarfik 1)
- tuttut 100-t Ameralimmi (aqutsiveqarfik 4)
- tuttut 100-t Qeqertarsuatsiaani (aqutsiveqarfik 5)
- tuttut 100-t Qassimi (aqutsiveqarfik 6)
- tuttut 100-t Neria-mi (aqutsiveqarfik 7)
Piniarnerup nalaani qamuteralaat atorneqaqqusaanngillat, aamma tuttutanik assartuutitut atoqqusaanngillat.
Naalakkersuisup erseqqissaatigaa pisassiissutit piffissarlu ilaqqinneqassanngitsut. Ukiuunerani tuttunniarnermut atatillugu aammattaaq piumasaqaataavoq pisaqareernerup kingorna pisanik nalunaarsuiffiit immersorneqarnissaat taakkulu kommunip sullissivianut ingerlaannaq utertinneqartarnissaat.
Ukiuunerani tuttunniarnissaq akerlerineqartoq
Ukiuunerani tuttunniarnissap ammaqqinneqarnissaa Qeqqata Kommunianiit aamma Kommuneqarfik Sermersuumiit taperserneqanngilaq tassanilu tuttut ukiuunerani pisariaqartumik eqqissisimatinneqarnissaannut aamma akiliisitsilluni piniartitsisinnaanerup suli atorluarnerulernissaanut innersuussillutik. KNAPK aamma Qaasuitsup Kommunia ukiuunerani tuttunniarnissap ammaqqinneqarnissaa kissaatigivaat.
Pinngortitaleriffik aqutsiveqarfinni Naternami, Kangerlussuaq-Sisimiuni, Akia-Maniitsumi Ameralimmi, Qeqertarsuatsiaani, Qassini, Neriami kiisalu Ivittuuni/Aqutsiveqarfik 11-mi ukiuunerani tuttunniartoqannginnissaa siunnersuinermini inassutigeqqippaa.
Taamaakkaluartorli Pinngortitaleriffik Nuussuarmi ukiuunerani tuttunniartoqarnissaa inassutigaat Saqqami tuttoqarluarnera, norraqarluanera kiisalu piffimmi inuussutissat navianartorsiornerat pissutigalugu. Taassuma saniatigut februaarimi nunap sermersimanissaa pissutigalugu ukiuunerani pinngortitami toquinnartartut amerliartorsinnaassasut taamaattumillu ukiuunerani sivisunngitsumik annerpaamillu sapaatip akunnerini pingasuni Nuussuarmi tuttunniartoqarnissaa inassutigineqarluni.
