Pinngitsaaliineq, angerlarsimaffinni eqqissiviilliornerit ikuallannerillu: Ukiutoqqami tigusat arlaliupput
Aalakoornartulinnik imigassartorsimallutik pinerluuteqartut arlallit Kalaallit Nunaata Politiivisa unnuaq tigusarisimavaat.
Politiinut ukiortaarsiorneq unnuaq ullaarlu ulapaarfiusimavoq. Aalakoornartulinnik imigassartorsimallutik annersaasut, angerlarsimaffimmi aqqusinernilu eqqissiviilliortut orniguffigisariaqarsimallugit, politiini pigaartut pisortaat Bjørn Bjerregaard oqaluttuarpoq.
Nunap ilaani arlalinni politiit unnuap ingerlanerani tigusarinnissimapput. Tigusarineqartulli amerlanersaat ullaap tungaagut iperagaareerput.
Ataaserli tigummigallagaavoq. Angut Uummannami pinngitsaaliisimasutut pasisaq ullup ilaagut eqqartuussivimmi killisiorneqassaaq.
Ikuallannerit marluk unnuaq aamma orninneqarsimapput. Siulleq Nuup Nuussuaani pisoq allalu Aasianni inissiat ilaanni pisoq.
Aasianni ikuallattoqarneranut atatillugu misissuinitik nangissallugit politiit pigaartuisa pisortaat oqarpoq.
Ikuallattoqarnerani ajoqusertoqanngilaq. Qummoroortartut ikuallattoornernut pisuusimassasut politiit ilimagaat.
