Ukiut marluk matuma siorna piartuummik napparsimavoq: Inequp Sermersuaq maanna ituissavaa
![Iqelu Holm Iqelu Holm](/sites/default/files/styles/image_934x467/public/article_images/iqelu_2.jpeg?itok=t-DtHP1a)
![](/sites/default/files/styles/image_934x467/public/article_images/inqu2.png?itok=I1_blqxc)
27-nik ukiullip, Nuummeersup, Inequ Holmip nutsani imusut naatsut attorpai.
- Nuannerluinnassaaq, Inequ Holm qungujorujussuarlu oqarpoq.
Taassuma Sermersuaq qaammatit pingasut qaangiuppata misigisassarsiorfigissavaa. Taassuma arnaq eqimattat immisulli akiuussimasut peqatigissavai.
Akiuunneq taanna peqqissusaanut, misigissusaanut – nujaanullu sunniuteqarsimavoq.
Taannami ukiut marluk matuma siorna nujaaruppoq. Taassuma sukkasuumik siaruaattartumik iviangimigut kræfteqalernini nujaarussutigaa, aamma tamanna misigisassanut maanna misilingajaligaanut periarfissaarutsitsivoq.
Ulluinnaat ulapaarfiusut
Taamani 26-nik ukioqartoq, Inequ Holm 2021-mi aggustimi unnukkut eqqumiitsumik malugisaqarpoq.
- Misigisimavara siulleq tassaavoq, ajortoqartoq pissusissamisuunngitsoqartoq, iviangima qulaatungaani malunnartorujussuarmik ammalortumik tinupasoqarpoq, Inequ Holm oqarpoq.
Siullermik eqqarsaatigivallaanngilaa. Inuususseruttorpormi. Taannami Københavnimi najugaqarpoq Københavns Universitetimilu kigutilerisutut ilinniarluni ullut tamaasa crossfitimik sungiusartarpoq.
- Inuuninni piffissami tassani ulapingaatsiartarpunga. Arpasukaaginnaq tulleriiaarisarpunga. Piffissami tassani inuuvunga piffissami maannakkumiippallaanngitsoq. Siumut pilersaarusiortareertuaannarpunga, imminullu naatsorsuutigingaatsiartarlunga, Inequ Holm oqarpoq.
Inequ Holmip iviangimini tinusumik malugisaqaqqaarneranit qaammatit marluk qaangiuttut, 2021-mi novembarimi tigunerup suuneranik akissutissarsinissamut Danmarkimi Napparsimmavissuarmut aggersarneqarpoq.
- Inequ Holm Rigshospitalimit matukkut anisoq isertumit allaanerusoq misigisimavunga, taanna oqarpoq.
Inequ Holm iviangikkut kræfteqariaatsit ilaannik nalinginnaasunik katsorsaariaatsinik katsorsaruminaatsumik ‘Triple-negativ’-imik taaneqartumik kræfteqalerpoq.
AAMMA ATUARUK Nunatsinni kræftertut Danmarkimisulli nakorsarneqarsinnaalertut
Kræftimik nappaat taanna iviangikkut kræfteqartut 15 procentiinut eqquisarpoq, arnallu inuusunnerusut eqqugaanerusarlutik, taamaammat 26-nnarnik ukioqarluni taama kræfteqalerneq qaqutigoortuuvoq.
Kræfti taanna sukkasuumik siaruaattartuuvoq, kræftimillu nappaatinut allanut sanilliullugu katsorsaanissamut periarfissat annikinnerullutik.
Taamaammat sukkasuumik sakkortuumillu katsorsartinnera, arlaleriarluni suliaritinnernik kemortinnermillu ilaqartoq erngertumik aallartinneqarpoq.
Inuunermut isiginninnera allanngortoq
Kræftimik napparsimalernera nujaarunneranik iviangeersinneranillu naleqarpoq, aammali takussutissiilluni.
- Ameraajarneqartutut misigaanga, soorlu isikkukkut, misigissutsikkut kinaassutsikkullu qaleriit ataasiakkaarlugit ilanngarterneqarlunga.
26-nik ukioqarluni piartuutaasumik napparsimalerpoq, maannakkummi pisinnaajuaannarsimasaagaluani tassanngaannartumik iliuuserisinnaajunnaarpai.
- Uannut naleqarsorisannik iliuuseqartuaannarnikuuvunga. Inuuninnilu aatsaat siullerpaamik imminut tusarnaartariaqalerpunga, taanna oqarpoq, nangillunilu:
- Aqussinnaanngisakka qujamasuutigisinnaalerpakka. Massakkumiissinnaanerulernera qujamasuutigeqaara. Piffissara ulapinnermut atorusunngilara, taanna oqarpoq.
![Iqelu Holm Iqelu Holm](/sites/default/files/styles/image_934x467/public/image00002.jpeg?itok=Csw2NpFu)
Privatfoto.
Ukioq ataaseq affaalu katsorsarneqareerluni peqqissisutut nalunaarutigineqarpoq.
Taanna 2021-mi juunip qulingani nalunaarfigineqarpoq.
- Inuunera tigoqqillugu misigisimavunga, ulloq taanna inuuissiortarnerma aappaatut maanna misigisimavara, taanna oqarpoq.
Inequ Holmilli peqqissisutut nalunaarutigineqannginnerminili sermersuup ituinnissaanut misigisassarsiornissaq paasisimavaa.
Expedition Pink Ribbon
Taassuma peqatigiiffik Expedition Pink Ribbon siorna upernaakkut takuaa.
Norgemiu nittartakkatigut nittartakkatigut malinnaavigineqarluni ilisimaneqarluartoq, Silje Løkeng misigisassarsiornermik aqutsisuuvoq, taassuma misigisassarsiornissaq Instagramimini oqaluttuaraa.
Inequ Holmip nammineq nunagisami sermersuarmi ituinnissaq soqutiginartilluinnalerpaa.
- Kilimanjaro qaqinikuuara, Arctic Circle Raceqataanikuunga aamma meeraallunga inuusuttuaraallunga sisorangaatsiartarnikuullunga, taanna oqarpoq.
Taassuma Silje Løkeng suliniummi misigisassarsiornissami aqutsisuusoq attaveqarfigaa, taakkulu Inequ Holmip suliniummut ilaanissaa erngertumik isumaqatigiissutigaat.
- Suliniut una uannut kisimi tunngassuteqanngilaq, inunnut allanut millionilinnut aamma tunngassuteqarpoq, taanna oqarpoq.
AAMMA ATUARUK Millionilikkaanik kræftimik eqqugaasunut illuliornissamut aningaasaleeqataasoqartoq
Inequ Holmip Silje Løkengillu peqataanerata saniatigut arnat allat marluk iviangikkut kræftimik aamma aniguisimasut peqataassapput. Matumani danskit radiokkut tv-kkullu aallakaatitsisartuat, Andrea Elisabeth Rudolph aamma ilaavoq.
Arnat Sermersuarmi isumannaatsumik ituinnissaat pissutigalugu arnanik allanik pingasunik – tassa ilitsersuisumik takornariartitsisunillu marlunnik ilaqassapput.
Misigisassarsiorneq iviangikkut kræfteqarneq pillugu ukkatarinnitsitsilernissamik siunertaqarpoq. Kræftimik qanoq pinaveersaartitsisinnaanersugut aammali qanoq pitsaanerpaamik katsorsarsinnaaneripput.
Tamatuma saniatigut arnat iviangikkut kræfteqarneq pillugu ilisimatusarnissamut, katsorsaanissamut pinaveersaartitsinissamullu aningaasanik katersissapput.
Arnat sisamat iviangikkut kræfteqarnerminnik aniguisimasut sermersuaq ituinnikuunngisaannarpaat. Inequ Holm angalanissaminnut qanoq naatsorsuuteqarnermik aperineqarami ima akivoq:
- Ilunni susoqarnera aqussinnaasatuaraara. Tassanngaanniillu angalanissarput nuannerlunilu sakkortujumaartoq nalunngilara. Ilunni allanngortoqarumaarpoq, taamaalillungalu illuatungaani suli nukittunerulersimassallunga, taamaalillungalu inuunermik nalinginnaalluinnartumik inuuneqarsinnaaleqqinnissara neriutiginarluinnarluni, Inequ Holm oqarpoq.
Misigisassarsiorneq Kangerlussuarmi maajimi aallartissaaq, tassanngalu Isertumut ingerlassapput. Misigisassarsiornerat ullunik 28-nik sivisussuseqassangatinneqarpoq.
Misigisassarsiornerat arnat inoqutinut attaveqaataasigut aamma Expedition Pink Ribbonsip nittartagaatigut malinnaavigisinnaavat.
Misigisassarsiorneq tamatuma saniatigut norsk TV-kkut isiginnaagassiarineqartussanngortinneqassaaq.