Nunatsinni kræftertut Danmarkimisulli nakorsarneqarsinnaalertut

Peqqissutsimut naalakkersuisup Mimi Karlsenip suliniutitaaq aallaavigalugu nunatsinni kræftimik nakorsaanermik periarfissat amerlivai, tamannalu nunatsinni kræftertut Danmarkimisulli nakorsarneqartalernissaannik kinguneqarpoq.

- Nakorsaanermik periarfissat amerlinerat siornatigut neqeroorutaasarsimanngitsumik nunatsinni kræftertut ilaat massakkornit pitsaanerusumik nakorsarneqarsinnaalerput.

- Nunatsinnili kræftertut amerlanerpaartaat Danmarkimisulli nakorsarneqartarput, nunatta nakorsaanera Henrik L. Hansen nakorsaanermik periarfissat amerlinerat pillugu oqarpoq.

Tassa nunatsinni kræftertut ilaannaat pitsaanerusumik nakorsarneqarsinnaalerput. Katsorsarneqarsinnaasumimmi nunatsinni kræftertut Danmarkimisulli nakorsarneqartortaqalereerput. Katsorsarneqarsinnaanngitsumilli kræftertut pitsaanerusumik nakorsarneqarsinnaalissasut, nunatta nakorsaanera nassuiaavoq.

- Kræftimik nappaatit assigiinngitsorpaaluupput, nunatsinnilu kræftertut nipaallisaataasinnaasumik inuunermilluunniit sivitsuutaasinnaasumik nakorsarneqartarput. Kræfteqarunnaassutaasinnaasumilli nakorsarneqartanngillat.

- Assersuutigalugu puammigut kræftertut ilorraallaatigisinnaasaannik inuunerannillu sivitsuutaasinnaasunik nutaanerusunik pitsaanerusunillu nakorsarneqarsinnaalissapput, Henrik L. Hansen oqarpoq.

Akisuumik nakorsarneqarnissamik akuerisaanikuunngitsortaqartut

Kræftertut tamarmik immikkut nutaanerusumik pitsaanerusunillu nakorsarneqarnissamik siornatigut naliliiffigineqartarput, taakkulu taama nakorsarneqarnissamik akuerisaanngeratarsinnaasarsimapput. 

- Nakorsaanerit Peqqinnissaqarfiulluunniit Tulleriissaarinermut ataatsimiititaliaa kræftertut nutaanerusumik pitsaanerusumillu nakorsarneqarnissaannik naliliisartuunikuupput, kræftertullu ilaat taama nakorsarneqarnissamik akuerisaanikuunngitsortaqarlutik. Kræftimillu nakorsaanermik katsorsaanermik periarfissat amerlinerat kræftertut taama nakorsarneqarnissamik neqeroorfigineqarnikuusimanngitsut Danmarkimisulli nakorsarneqarsinnaalissapput, peqqissutsimut naalakkersuisoq KNR-imut allappoq.

Nakorsaariaatsit nutaanerusut akisunerillu kræftertut ilaannut siornatigut neqeroorutaasinnaanngeratarsinnaasarsimasut uani ingammik pineqarput.

Soorlu timip kræftimut nammineerluni akiuunnissaannut timip akiuussutissaanut patajaallisaammik nakorsaaneq nunatsinni siornatigut neqeroorutaasarsimanngitsoq maanna neqeroorutaalerpoq.

- Nakorsaariaaseq taanna akisuvoq, nunatsinnilu maanna neqeroorutaalerluni, Henrik L. Hansen erseqqissaavoq. 

Kræftertunut arlaqanngitsunut sunniissasoq

Nunatsinni kræftertut Danmarkimisulli nakorsarneqartalernissaat kræftertunut qassinorpiaq sunniissanersoq oqaatigiuminaappoq. Kræftertunulli amerlavallaanngitsunut sunniiumaartoq, nunatta nakorsaanera isumaqarpoq.

- Kræftertut ilaminiinnaannnut, tassa ukiumut immaqa 20-25-t missaannaannut, sunniissassangatipparput, Henrik L. Hansen oqarpoq.

Kræftertulli ilaat pitsaanerusumik nakorsarneqarnissamik itigartitsisortaqartarput. Pitsaanerusumimmi nakorsarneqarsinnaajumallutik sivisuumik Nuummiittariaqartassagamik Danmarkimiittariaqartassallutilluunniit.

Taamaammat kræftertut tamarmik taama ilumut nakorsartikkusunnersut paasiniarlugu tamatuminnga paasiteqqissaarnissaat pisariaqarpoq.

Nunatsinni kræftertut Danmarkimisulli nakorsarneqarsinnaalernerat 2023-imi juunip tungaanut atuutissaaq, tamatumalu kingorna qanoq iliortoqartassanersoq Naalakkersuisut nalilersussavaat.

- Katsorsaanermi neqeroorut annertusineratigut Naalakkersuisut paasissutissat pisariaqartut pissarsiarissavaat, siunissamilu innuttaasut kræftimik katsorsariaatsit sorliit pissarsiarisinnaaneraat nalilersorneqarsinnaalissapput, Mimi Karlsen tusagassiuutinut nalunaarpoq.