Nunatsinni folketingemut sisamanngormat qinersinermi qinersiartortut ukiuni kingullerni 25-ni folketingemut qinersisoqartarnerani aatsaat taama ikitsigipput.
Qinersisinnaasut affangajaat qinersiartorput.
Kingullermik folketingemut qinersisut ikinnerpaagamik pivoq 1990-mi folketingemut qinersisoqarmat.
Taamani qinersisinnaasut 50,8 procentii qinersiartorput, folketingep nittartagaani folketinget.dk-imi taamanna atuarneqarsinnaavoq.
Qinersisartut affaanik ikinnerusunik qinersiartorsimanerat malugineqarsinnaavoq, kalaallit qinigassanngortittaat Danmarkimi naalakkersuisunngortitsinissamut aalajangiisungajalluinnarmata.
Folketingemut qinersisarnermi qinersiartortut ikinnerpaagamik 1987-mi pivoq, taamani qinersisinnaasut 45 procentiisa missaanniittut qinersiartorput.
1977-mi folketingemut qinerisisoqarmat qinersiartortut amerlanerpaapput. Taamani qinersisinnaasut sisamaagaangata taakkunannga pingasut qinersiartorput.
Folketingemut qinersinermi ippassigami pisumi, Aleqa Hammond Siumut aamma Aaja Chemnitz Larsen qinigaapput.
Aleqa taaneqangaatsiartoq
Aleqa Hammondimut qineqqusaarneq oqitsuinnaanikuunngilaq. Taannami qinigassanngortippoq Nunatta Karsianik atornerluisimasutut ilisimaneqarluni, kinguninngualu atornerluisimanera marloriaammik annertunerusoq paasineqarluni. Aamma parteeqatiminit toqqaannartumik unammillerneqarpoq qineqqusaaqatai Aleqa Hammondimut sanilliullutik tatiginarnertut imminnut saqqummiukkamik.
Qinersisartulli Aleqa qimanngilaat, taannalu taagorneqarnerpaalluni, 3.745-nik taaneqarami. Tassa qinersiartortut 18,3 procentiisa taasimavaat.
IA-p iluani unammineq
Aaja Chemnitz Larsenip unammillertai annerpaat partiianinngaanneerput. Taanna 2.540-nik taaneqarpoq, Johan Lund Olsen 2.344-nik taaneqartoq kiisalu Múte B. Egede 2.121-nik taaneqarluni.
Qinersisinnaasut amerlasuut sisamanngornermi qinersisoqarmat taasiartunngillat, tassa taasisinnaasut 50 procentiinnai taasiartorsimagamik.
Demokraatit 8,5 procentinik taaneqarput, Atassut 7,4 procentinik taaneqarluni kiisalu Partii Naleraq 4,7 procentinik taaneqarluni.