Ukiuni 40-ni socialistit aqutsisuunerat Atassutip Demokraatillu unitsikkusuppaat

Taama nalunaaruteqarput partiit taakkua marluk siulittaasui Aqqalu Jerimiassen aamma Jens Frederik Nielsen, attaveqatigiittarfimmi Facebookimi.

-  Maani  nunatsinni nutaamik misiliinialerpugut.  Talerperliunerusut ersarinnerulissapput, Demokraatit Facebookimi nittartakaminni taama allapput imalu itisiliillutik:

AAMMA ATUARUK Atassut Naalakkersuisunut ikorfartuiunnaartoq

- 1979-imili Namminersornerullutik Oqartussat aallartimmata Kalaallit Nunaat saamerlernit aqunneqarnikuuvoq. Tamanna Demokraatit Atassutillu alanngortikkusuppaat. Nunatsinni killilersuinernik millitsiniaarusuttunik politikereqarnera malunnartikkusupparput, ukiullu 40-t sinnerlugit saamerliit aqutsisuunerat unitsillugu.

Taakkua marluullutik saamerliit naalakkersuisooqatiginikuuaat

Inuit Ataqatigiit Naleqqallu naalakkersuisooqatigiittut Atassutip tapersersuiunnaarnera ulloq aallarnerfigalugu Atassut Demokraatillu suleqatigiilerput.

Partiit taakkua marluk saamerlernik naalakkersuisooqateqarnikuugaluarput. Kingullermik Demokraatit Siumut naalakkersuisooqatiginikuuaat, ukiullu arlaqanngitsut matuma siorna Atassutip aamma Siumut naalakkersuisooqatiginikuullugu.

Partiilli talerperliit illuatungiliunnissaat maannakkumiit nakkunneqartariaqalerpoq.

AAMMA ATUARUK Demokraatit borgmesteri tunuartikkusuppaat - taamaanngippat namminneq tunuassapput

Demokraatit saqqummiussaat naapertorlugu, Inatsisaartut ataatsimiititaliaanni teknikkikkut suleqatigiinnissaq pineqarpoq.

- Taamaammat Demokraatit manna tikillugu Siumumik teknikkikkut suleqateqarnerminnit tunuarput kisialu Atassut saamerliit naalakkersuisuunerannut tapersersuisuunertik unitsillugu, Demokraatit allapput.

Inatsisartuni ilaasortani 31-usuni tallimat  Demokraatit Atassullu ilaasortaatitaraat.