Demokraatit borgmesteri tunuartikkusuppaat - taamaanngippat namminneq tunuassapput
Kommneqarfik Sermersuumi suleqatigiinnut ikorfartortaasut tassa Demokraatit borgmesterimik Charlotte Ludvigsenimik tatiginnikkunnaarput. Taamaammat partiip borgmesteri soqatigerusukkunnaarpaat.
- Borgmesterimut tatiginninnerput innarlerneqarpoq. Kommunimi borgmesterip tullersortaa siulleq, Demokraatinit Justus Hansen oqarpoq.
Borgmesterip suliani arlalinni naliliisinnaanerlunnerminik takutitsinerata kingorna Demokraatit borgmesterimut, IA-meersumut Charlotte Ludvigsenimut tatiginnikkunnaarput.
... borgmesteri, Charlotte Ludvigsen (IA) kommunalbestyrelsimi suli amerlanerussuteqassaaq.
Inuit Ataqatigiit, Demokraatit Nalerarlu kommunimi suleqatigipput.
Inuit Ataqatigiit qulingiluanik qinigaatitaqarpoq.
Demokraatit marluk.
Naleraq marluk.
Kommunimi suleqatigiit katillutik 13-iupput.
Siumut arfinilinnik qinigaatitaqartoq kisimi illuatungiliuttuniippoq.
Demokraatit illuatungiliuttunngussaguni illuatungiliuttut kommunalbestyrelsimi katillugit arfineq-pingasunik qinigaatitaqassapput, kommunimilu suleqatigiittut aqqaniliulissallutik.
Taassuma Charlotte Ludvigsenip atorfillillu pingasut Nuummi akiuussusersuinermi siuleriiaattunik juulip ulluisa 22-anni qaangiiginnarneranut tunngatillugu suliaq eqqaavaa.
Justus Hansenillu tamatuma kingorna borgmesterip kommunimi aningaasanut ataatsimiititaliap oqaluuserisimanngisaani, 20 millionit koruuninut tunngasumut allakkamut siorna atsiorsimanera innersuussutigaa. Aningaasat taakku 2025-mi inissiarsinissamut atorneqartussaapput.
AAMMA ATUARUK Borgmesteri kommunip pisortai politiinut unnerluutigisaasut pillugit: Tatiginninnera atornerluppaat
Charlotte Ludvigsenip oqarnera naapertorlugu kommunimi pisortaanerusimasup, Lars Møller-Sørensenip borgmesteri sumik atsiugassaqarnersoq pillugu iluamik paasissutissiisimanngilaq. Taamali oqarnera pisortaanerusimasup ilisarisinnaanngilaa.
Suleqatiginnikkunnaarnissamut piareersimasut
Suliaq Iserimmut 20 millionit koruuninik atortitsinissamut tunngasoq Aningaasaqarnermut ataatsimiititaliami ullumi oqallisigineqassaaq.
Justus Hansenip borgmesteri tunuanngippat partiimi kommunimi IA Naleqqallu suleqatigineranit tunuartinnissaanut piareersimalluni ataatsimiittoqannginnerani nalunaarutigaa.
- Soorunami borgmesterimut tatiginninngikkutta tamanna aalajangissagipput erseqqarippoq, Justus Hansen oqarpoq.
Borgmesteri tunuanngippat suleqatigiinnermit aniniarlusi partiimi aalajangerpisiuk?
- Aap, taamaaliorpugut.
Kommunimi partii suleqataasoq naapertorlugu borgmesterip 20 millionit koruuninik atortitsinissamut atsiornerata maanna suliarineqarnissaa isumatsialaanngilaq.
- Nakkutilliisuni nalunaarummik tamakkiisumik pissarsineqarata maanna qaqinnissaa isumatsialaanngilaq. Taamaammat tassunga tunngatillugu aalajanngiissuteqarnianngivippugut, Justus Hansen oqarpoq.
AAMMA ATUARUK Sermersuumi ineqarnermut suliamut akisussaaffik Siumup inissikkusuppaa
Sermersuumi partiip suleqataasup aappaa, Naleraq suliap maanna isumagineqarnera pissutigalugu oqaaseqarsinnaanngikkallarpoq.
Illuatungiliuttut partiiata Siumup 20 millionit koruuninut tunngatillugu suliap oqallisigineqarnissaa maannamut itigartitsissutigigallarpaa.
- Siumup suliaq amigartumik paasissutissiiffiummat isumaginniffiginianngilaa, Inga Dora Markussen KNR-imut oqarpoq.
Suliaq Aningaasaqarnermut ataatsimiititaliami ullumi nalunaaqutaq marlunut oqallisigineqassaaq.
