Sermersuumi ineqarnermut suliamut akisussaaffik Siumup inissikkusuppaa
Kommuneqarfik Sermersooq Namminersorlutik Oqartussanit sakkortuumik isornartorsiorneqarpoq.
Namminersorlutik Oqartussammi Nakkutilliisuutitaata kommunep Nuummi inissianik nutaanik aningaasalersueriaasaa misissornikuuaat. Tassani inissiat 416-it pineqarput. Nakkutilliisuutitat naliliinerat naapertorlugu kommunep malittarisassat unioqqutissimavai, illoqarfiillu pingaarnersaanni inissianut atatillugu ingerlatseriaaseq isorineqaqisoq unitsinneqaqqullugu.
Kommunit Nakkutilliisoqarfiat pillugu paasissutissat
Suliamik Kommunit Nakkutilliisoqarfiannut ingerlatitseqqiinissamut naammattunik tunngavissaqarnersoq, Naalakkersuisut aalajangigassaraat.
Kommunit Nakkutilliisoqarfiata nunatsinni kommunalbestyrelsit nakkutigisarpai.
Tassani ilaasortat tallimaapput. Savalimmiuni Ombudsmandi, Sólja í Ólavstovu, siulittaasuuvoq.
Kommunit Nakkutilliisoqarfiata kommunalbestyrelsip, aningaasaqarnermut ataatsimiititaliap ataatsimiititalialluunniit allap suliamut attuumassutillip aalajangernera inatsisinik unioqqutitsiffiusimappat atorunnaarsissinnaavaa.
Kommunit Nakkutilliisoqarfiata kommunimi aalajangigaq suliaritillugu atorunnaarallarsissinnaavaa.
Kommuneqarfik Sermersoorlu namminersortut inissiaataannik innuttaasunut attartortitseqqiisarunnaarallartitaavoq.
Namminersorlutik Oqartussat Nunamut Namminermut Immikkoortortaqarfiat kommuninik nakkutiginnittuullunilu Kommunit Nakkutilliisoqarfiannut allattoqarfiuvoq.
Tusarfik: Aqutsinermut inatsit
Apriilimili kommunemut qinersinermi nutaanik qinigaasoqarnikuummat, Siumumi illuatungiliuttut suliap tamarmi saqqummiunneqarnissaa piumasaraat.
AAMMA ATUARUK Kommuneqarfik Sermersooq nakkutilliisoqarfimmit isornartorsiungaatsiarneqarpoq
Inissiat pillugit suliap kommunalbestyrelsemi immikkut ittumik ammasumik ataatsimiinnermi saqqummiunneqarnissaa, partiip kissaatigaa.
- Nakkutilliisuutitaqarfiup aalajangernera suliallu qanoq ingerlanneqarsimaneranut takussutissat kommunalbestyrelsemi ilaasortanut nutaanut saqqummiunneqartariaqarput, suliamut ilungersunartumut akisussaaffiup inissinneqarnissaa aalajangiiffigineqarniassammat, Siumut allappoq.
Kommunalbestyrelsemili amerlanerit ataatsimiinnermi matoqqasumi aatsaat suliaq oqallisigerusuppaat.
Inissianik akilersueriaatsimut Siumut aningaasaleeqqikkusunngilaq
Manna tikillugu Kommuneqarfik Sermersuumi borgmesteriunikoq, Asii Chemnitz Narup (IA) akisussaasutut sassarnikuuvoq.
Kommunemimi inissianik amerlanerusunik qulakkeeriniarluni aammali artukkiisumik, inissianik akilersuisalernerup nalaani taanna borgmesteriuvoq.
- uanga akisussaaffiga qimarratigerusunngilara, erseqqissartariaqarparali allaffeqarfimmi anguniagaq ataasiinnaanikuusoq: Piffissami inissianik annertoorujussuarmik pisariaqartitsinitta kiisalu innuttaasut amerliartuinnarnerisa nalaanni, inissianik iserterfigineqarsinnaasunik amerlanerpaanik qulakkeerisaqarniarnissaq, suliaq pillugu Asii Chemnitz Narup allappoq.
Naatsumik oqaatigalugu, sanaartortut namminersortut sivisuumik ingerlasussamik, tassa ukiut 10-t 15-illu akornanni sivisussusilinnik kommunemit isumqatigiissuteqarfigineqarnikuupput. Sanaartortut namminersortut taava inissiat sanaartoriarlugit kommunemut attartortsippai.
AAMMA ATUARUK Kommuneqarfik Sermersuumi borgmesteriusimasup ineqarnermut suliaq pillugu isornartorsiuineq ilungersunartumik tigugaa
Tamatuma kingorna taava kommunep nammineq inissianik ingerlatsivimminut Iserit A/S-imut attartortippai.
Sanaartortunulli namminersortunut kommunep attartornerminut akiliutai, inissiani inillit akiliutaannit annertunerupput. Taamaammat attartornernut isumaqatigiissutit tamaasa naapertorlugit amigartoorutinik kommune matussusiisussaasarluni.
Taamatut ingerlatseriaaseq 2015-imi aallartippoq, taamanikkorniillu kommune tassunga amerliartuinnartunik aningaasartuuteqarnikuulluni.
Assersuutigalugu taamatut aaqqiinikuuneq 2020mi kommunemut 11 millioninik kiisalu ukioq manna aappagulu 17 millioninik akeqassaaq. Tamatuma saniatigut kommune aappaagu 1 millioni koruuninik aningaasartuuteqartussaavoq, tassa 2022mi kommune katillugit 28 millioni koruunit taamatut aaqqissuussinermut aningaasartuutigissallugit.
Kommunemiit nalunaarut naapertorlugu inissianut taamatut aaqqissuussineq unitsinneqarnikuuvoq, taamaattorli sanaartortunut namminersortunut isumaqatigiissutinut sivisuumik ingerlasussanut pituttornikuulluni.
