Professori: Kommunip akiuussusertinneq pillugu isornartorsiorneqarnera sakkortullunilu ilungersunarpoq
![](/sites/default/files/styles/image_934x467/public/article_images/7v9a1014.jpg?itok=TyGcdX4Q)
- Kukkulaaginnarnermit ilungersunarnerusoq isumaqarpunga, suliaq ilungersunarneruvoq, pisortat ingerlatsinerannut tunngasunut Københavns Universitetimi professori Michael Gøtze KNR-imut oqarpoq.
Eqqartuussissuserisup suliamut misissuinera kommunalbestyrelsimut sapaatit akunnerata siuliani saqqummiunneqartoq taassuma atuarsimavaa. Borgmesteri Charlotte Ludvigsen atorfilittallu pingasut siuleriiaattut qaangiinnarlugit coronavirusimut akiuussuserneqareersut eqqartuussissuserisoq misissuitinneqarpoq.
Borgmesterip akiuussutisserneqarneqarnera pillugu suliaq:
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
- Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
Misissuinermilu inerniliussaavoq: ”Juulip ulluisa 22-anni akiuussusersuisoqarnerani ingerlatsinermi ileqqorissaarnissaq kommunip onioqqutippaa, tassanilu ileqqussaanngitsumik pissaanermik allannguinissamut inerteqquteqarnermut naapertuutinngitsumik attuumassuteqanngitsut nammineq soqutigisanut ilanngutitillugit".
AAMMA ATUARUK Akiuussusertinnermut suliaq: Charlotte Demokraatinit naveersippoq
Isornartorsiuinerup ilungersunarnera iluamik paasiniaraanni oqaaseq 'ileqqussaanngitsumik' immikkut maluginiarneqassasoq Michael Gøtzep nassuiaatigaa:
- Oqaaseq inatsisilerinermut tunngasinnaasoq 'ileqqussaanngitsumik" pisimasariaqanngilluinnartumik pisoqarsimaneranik nassuiaaniarnermut atorneqakkajuppoq. Isornartorsiuinerlu uani sakkortuvoq, siuleriiaattummi qaangiinnarlugit kapitikkiartorsimaneq, taamaalinikkullu inatsisitigut kukkuneq, isornartorsiorneqarsinnaavoq, taanna oqarpoq.
Pissaanermik allannguiniarneq
Taassuma misissuinermut tunngatillugu maluginiarpaa, ileqqussaanngitsumik pissaanermik allannguinissamut inerteqquteqarnerup unioqqutinneqarsimanera, tamannalu suli annerusumik isorinnilersitsivoq.
- Pisut qanoq ilungersunartiginerinut inatsisini uuttuuteqanngilagut, taamaattumik matumani kisitsisiliisinngilagut, kisianni pingaartuuvoq pissaanermik allannguiniarnerup najoqqutarinissaa, tamannalu unioqqutinneqarsimassappat taava ilungersunavissutut uanga nalilerpara, taanna oqarpoq nangipporlu:
AAMMA ATUARUK Borgmesteri: Tamakkiisumik taperserneqarpunga
- Pissaanermik allannguinissamut inerteqquteqarnerup iluani unioqqutitsisoqarneraasoqarpat, taava tamanna inatsisilerituut eqqartuussisuserisullu siutaanni oqaatsit tamakku sakkortuutut paasineqassapput, tassalu taava ingasalluinnartumik kukkuluttortoqarsimassaaq.
Michael Gøtzep oqarnera naapertorlugu, oqaatsit marluk tassa pissaanermik atornerluineq aammalu pissaanermik allannguiniarneq assigiinngilluinnartuupput. Inatsisilerinerummi iluani nalilersuinermi oqaaseq "pissaanermik atornerluineq" atorneqarneq ajorpoq.
"Kommune" kinaagami?
Misissuinerup inerniliussaa erseqqarinngilaq oqaasermi "kommune" oqaatigineqartillugu taassuma oqaatsip iluaniippaluttutut paasinartarpoq borgmesteri aammalu atorfilittat pineqartunganerat.
- Taamaattumik erseqqissumik tamanna takujuminaappoq, Michael Gøtze oqarpoq nangipporlu:
- Oqaatsip "kommunep" iluani inuit pineqartungagaluarput, imaassinnaavoq aamma pineqartut ilaannai eqqartorniarneqaraluartut. Naluara, kisianni tamakkua inatsisilerituut naliliiniarneranni takornartaaneq ajorput. Taamaattumik oqartussat isaanniit iseqarluni naliliisoqartariaqartarpoq itinerusumullu pinaveersaaginnartariaqarluni aammalu inunnut ataasiakkaanut tikkuartuinaveersaartoqartariaqarluni, oqarpoq.
AAMMA ATUARUK Eqqartuussissuserisup akiuussutissalersuineq pillugu misissuinermini kommuni isornartorsioraa
Borgmester Charlotte Ludvigsenip nammineq aamma pissaanermik atornerluisoqannginnera qularutiginagu oqaatigaa.
Sapaatip akunneratalu siuliani KNR-mut ima oqarpoq: "Akiuussusertinninnut tunngasumik suliaq eqqartuussisuserisunit suliarineqareerpoq, misissuinerullu takutippaa, ingerlatsinermi ileqqorissaarneq unioqqutinneqarsimasoq, kisianni misissuinerup aamma takutippaa pissaanermik atornerluisimanngitsunga, taamaattumillu partiit tamarmiusut uannut suli tatiginnipput".
Taamatuttaaq eqqartuussisuserisut misissuinerisa inerniliussaanni allassimasoqarpoq, akiuussusertinnissaq sioqqullugu atorfilittaq ataaseq siorasaarisimasoq akiuussusersuisarfimmi kommunip ikiuunnera unitsinneqassasoq.
- Taassumunnga inummut tunngatillugu equngasoqarpoq, taanna ileqqussaanngitsumik oqaaseqarsimavoq, tassunga tunngatillugu ajortoqarneranik ersertoqarpoq. Tamannalu inatsisinut akerliusumik iliorneruvoq, tassa matumani pineqarmat inuit taakkua allanit utaqqisorpassuarnit salliutinneqanngippata kommune suleqataaniarnani tunuartermat, Michael Gøtze oqarpoq.
Kommuneqarfik sermersuumi kommunalbestyrelsep eqqartuussisuserisut misissuinerat sapaatip akunnerata siuliani ataatsimiissutigaat. Ataatsimiinnerullu kingorna partiit tamarmik borgmesterimut tatiginninnerminnik uppernarsaallutik atsioqatigiipput.