Akiuussusertinnermut suliaq: Charlotte Demokraatinit naveersippoq
![](/sites/default/files/styles/image_934x467/public/article_images/justus-hansen_1.jpg?itok=UP549r2U)
Akiuussusertinnermut suliaq nutaarsiassaqartitsivinni aaggustip aallartilaarnerani saqqummiunneqarmat Kommuneqarfik Sermersuup borgmesterianut, Charlotte Ludvigsenimut (IA), isornartorsiuinerit imaaginnavipput.
Taamani saqqummiunneqarpoq borgmesteri atorfilittaalu pingasut, innuttaasut akiuussusertinniarlutik silami sialuup ataani utaqqisorpassuarnit siulliullutik, akiuussuserneqarnissaminnut siorasaarisimasutut pasineqartut.
Borgmesterip akiuussutisserneqarneqarnera pillugu suliaq:
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
- Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
- Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
- Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
- Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.
Isornartorsiuisut ilagaat Demokraatit, Kommuneqarfik Sermersuumi Inuit Ataqatigiinnut aamma tapersersortaasut.
- Borgmesterip naliliisinnaassusaa ajorpoq, takusinnaanngilaaluunniit uffa tunuleriiaattorpassuaqartoq. Nammineq tamakku qaangiinnarlugit matukkut allakkut iserlunilu anisimavoq, Justus Hansen KNR-imut aggustip aallartisimalernerani taama oqarpoq.
AAMMA ATUARUK Demokraatit Charlotte Ludvigsen pillugu: Pissaanermik atornerluinerup killinganiippoq
Demokraatilli maanna qasukkaamipput.
Kommunalbestyrelsimimi partiit tamaasa peqatigalugit ataatsimut oqaaseqaateqarlutik
borgmester Charlotte Ludvigsenimut suli tatiginnillutik nalunaaruteqarlutik atsioqataapput.
Taamaalilluni partii isummersimagaluarnerminik illuanut saatitsivoq.
- Ilumut, tamanna politikerisut pisinnaatitaaffigineqarpoq, politikeriugaluaraanniluunniit suli inuinnaasoqarsinnaavoq, Demokraatit gruppiata siulittaasua aamma borgmesterip tullersortaa Justus Hansen KNR-imut taama oqarpoq.
- Pissutsit piviusut aallaavigivakka, taakkualu pissutsit piviusut eqqartuussisuserisut missuereerlutik saqqummiuppaat. Taakkualu tassa aallaavigivakka, misigissusaanngitsullu.
Borgmesteri naveersippoq
Eqqartuussisuserisut misissuinerat Nuna Advokatinit suliarineqarpoq, taannalu kommunalbestyrelsip matoqqasumik marlunngornermi ataatsimiinnerani saqqummiunneqarpoq.
Misissuinermi inerniliunneqarpoq kommunip ingerlatsinermut ileqqorissaarnissaq suliami unioqqutissimagaa – tassa ima paasillugu ileqqorineqartussat malillugu ileqqulersortoqarsimanngilaq.
Tamanna pivoq borgmesterip atorfillillu pingasut ”atuuffitsik pissutigalugu imminnut iluaqutissarsillutik” akiuussutissamik allanit silami siallertumi utaqqisunit siulliullutik kapitinnerat pissutigalugu ileqqorissaartoqarsimanngitsoq inerniliunneqarmat. Siuleriiaattorpassuarnit utaqqisut amerlasuut akiuussutissat amigarmata iluatsitsinatik angerlaannarput.
Eqqartuussisuserisut misissuinerata aamma inerniliuppaa Charlotte Ludvigsen, siusinnerusukkut saqqummiunneqaraluartutut, akiuussuserneqarnissaminut kimigiiserluni siorasaarisimanngitsoq. Taamaalilluni akiuussuserneqarnermut suliaq borgmesterimut politikkikkut kinguneqartitsinertaqanngitsumik tamaannga killilerneqarpoq, borgmesterilu atuuffimmini ingerlaqqiinnassaaq.
Charlotte Ludvigsenimulli kinguneqartitsisoqarsimavoq. Nunatsinnimi kommunit annersaanni kommunalbestyrelsimi Demokraatit ilaasortaatitaasa Charlotte Ludvigsen naveersimavaat.
AAMMA ATUARUK Borgmesteri: Tamakkiisumik taperserneqarpunga
- Soorunami naliliisinnaalluannginnera pillugu naveerparput. Aamma soorunami utoqqatsernera tusaatissatut tiguarput, Justus Hansen oqarpoq.