Atassut Naalakkersuisunut ikorfartuiunnaartoq
Atassutip naalakkersuisoqatigiinnut ikorfartuiunnaarpoq.
Aqqalu Jerimiassen KNR-imut taama nalunaaruteqarpoq.
Naalakkersuisoqatigiit Inuit Ataqatigiit, Nalerarlu taamaalillutik annikinnerpaamik amerlanerussuteqalerput.
Inuit Ataqatigiit Nalerarlu 16-inik qinigaatitaqarpoq.
Illuatungiliuttut maannamut 13-inik qinigaatitaqaraluarput. Atassutilli ikorfartortaajunnaarneratigut illuatungiliuttut Inatsisartuni maanna 15-iulerput.
Atassut naalakkersuisoqatigiinnut sooq ikorfartuiunnaarnersoq partiip siulittaasuta oqaatigerusunngilaa.
Isummamik allanngortitseriataartoq
Atassutip naalakkersuisoqatigiillu suleqatigiinnerat pisoqarfiungaatsianngikkaluarpoq. Partiip aningaasanut inatsit sapaatip akunnerata siuliani atsioqataaffigaa - ataatsimilli qularnartoqarpoq: Atassutip suliffeqarfiit sulisuminnut akeqanngitsumik ajunngitsorsiaritittagaannut, assersuutigalugu internetteqartitsineq, oqarasuaatit angalanerilluunniit akileraaruserneqartalernissaanut siunnersuut akuersaarniarunnaarlugu qaammammi matumani siusinnerusukkut aalajangerpaa.
Aqqalu Jerimiassenip siunnersuut aallaqqaammut akuersaaraluarpaa, partiimullu tapersersuilluni, isummanili allanngorteriataarpaa.
Apriilimi ikorfartortaalersoq
Ullumi nalunaaqutaq 15.00 immikkut ittumik ataatsimiinnissamut aggersaasoqarpoq, tassanilu ”naalakkersuisoqatigiinni suleqatigiinnermi allannguineq” pineqassaaq. Inatsisartunut siulittaasup tulliani aamma ataatsimiititalianut ilaasortanik sinniisussanillu toqqaanissaq oqaluuserisassatuaavoq.
Aqqalu Jerimiassen Inatsisartuni siulittaasup sisamaattut inissisivoq.
Inuit Ataqatigiit qinersisoqarnerani taaguunneqarnerpaallutik Inatsisartuni qinigaaffinnit aqqaneq-marlunnik qinigaatitaqalerpoq. Taamaammat partiip siulittaasua, Múte B. Egede Naalakkersuisuni siulittaasunngorsinnaaniarluni naalakkersuisoqatigiinni suleqatissarsiorpoq.
Atassut Naleraq peqatigalugu isumaqatigiinniarnerit apriilip naanissaata tungaanut peqataapput. Atassullu tassaniilli ullumikkumut naalakkersuisoqatigiinnut ikorfartortaavoq.
