Ukiortaami oqaaseqaat: Siumup isummani aalajangiusimavaa
Aatsitassarsiornermi uuliasiornermilu suliniutit angisuut aallartilernerat 2012-mi oqallisaaqaaq. Pisuussutit uumaatsut annissornerannut akitsuusiinissamik Siumup siunnersuutaa amerlanerussuteqartunit ilalerneqanngilaq. 2013-mili inatsisartunut qinersinissami isuma tamanna aalajangiusimaneqarniarpoq.
- Pisuussutivut uumaatsut pigisavut tassaapput imminut napatilernissamut aqqutissat pingaaruteqarluinnartut qitiusut ilaat. Pisuussutitsinnit annissorneqartussanit inuiaat kalaallit uagut piginnittuusugut pissarsiassatsinnit salliutinneqarnissarput Siumut ukiumi nutaami qulakkeerinnissaminut siunnerfeqarpoq, Siumup siulittaasua Aleqa Hammond ukiortaami oqaaseqaammini allappoq.
- Siunnerfik tamanna innuttaasunit peqataaffigineqarumappat angusassaq angisooq inuiattut angusinnaalluaripput qularutiginngilarput. Anguniagassaavoq imaaliallaannarluni anguneqarsinnaanngitsutut isikkulik, ataatsimulli inuiaqatigiit anguniarlugu siunnerfigigutsigu anguneqarsinnaasoq Siumut isumaqarpoq, taamaammat ukiumi nutaami anguniagaqarnermut Siumut peqatiserinnippoq inuiaqatigiinnullu kalaallinut saaffiginnilluni ataatsimut anguniakkatsinnut peqatiserinnilluni, Aleqa Hammond oqarpoq.