"Ukiorpassuarni pimoorussillu iliuuseqartoqartarsimanngilaq"

- Ajuusaarnarpoq anguniagassaq taamak imaannaanngitsigisoq aningaasanik sipaarniarfittuinnaq inissinneqarmat. Pissusiviusunik qimarratiginninneruvoq sulisorpassuarnut angajoqqaanullu meeqqanut ikiortarialinnut pisariaqanngivissumik puffassaarutaannaalluni, IA-meersoq oqarpoq.

KANUKOKA allallu soqutiginnittut assigalugit,  sammisaqarfik tamarmi nalilersoqqittariaqarto, Inuit Ataqatigiit isumaqarpoq.

-  52 mio. koruunit maanna ukiumut atorneqartarput, ajoraluartumillu nalinginnaavallaarpoq pitsaanngitsumik atuineq. Inuit Ataqatigiinniit apeqquserparput annertusisamik immikkut ittumik atuartitsineq ilumut maannakkorpiaq kommuninut akisussaaffinngortinneqassanersoq, oqarpoq, nuna tamakkerlugu iliuuseqarnissaq pisariaqarneraatigalugu.

Inuit Ataqatigiiniit isumaqarput immikkut atuartitaanerup sumerpiamiinnera, pisariaqartinneqartut suuneri siunissamilu periarfissat paasiniarniarlugit aningaasaliisoqartariaqartoq, aatsaat taamaaliornikkut aningaasaliinerit ikilisarneqarsinnaassammata.

- Aatsaat tamanna pisinnaavoq ukiut arfinillit qulillu akornanni ingerlareerpata. Tamannalu pisariaqarpoq ukiorpassuarni pimoorussilluni iliuuseqartoqartarsimanngimmat aatsaallu ukiuni kingullerni siusissumik iliuuseqartarnissap pingaaruteqarnera tunngavigalugu sulisoqartalermat, Juliane Henningsen oqarpoq.