ASSIT Ukioq manna Ujarassiorimmi ajugaasut
Petra Bidstup Kullorsuarmiu ukioq manna Ujarassiorimmi akissarsiassat annersaannik 55.000 koruuninik akileraarutitaqanngisunik akissarsitinneqarpoq.
Nassaava tassaavoq ujarak aatsitassanik sulfidinik sananeqaatilik Upernaviup avannaani Kullorsuup nunaqarfiata killingani nassaarisimasaa. Kullorsuup eqqaani zinkimik akulinnik aatsitassaqarsinnaaneranut tamanna nutaamik paasissutissiivoq.
Ajungaasut aappaat tassaavoq Peter Filemonsen Sisimiuneersoq akileraarutitaqanngitsunik 25.000 koruuninik akissarsitinneqartoq. Peter Filemonsenip nassaava tassaavoq ujarak sulfidinik aatsitassartalik nikkelimik aamma koboltimik saffiugassinillu platinimik assigisaanillu aamma akoqartoq. Ujarak taanna Sisimiut eqqaani nassaarineqarpoq, nassaallu takutippaa sumiiffimmi tassani eqqaanilu aatsitassanik taamak itsunik nassaassaqarsinnaasoq.
Ajungaasut pingajuattut akileraarutitaqanngitsunik immikkut tamarmik 10.000 koruuninik akissarsitinneqartut marluupput. Tassalu Jonathan Davidsen, Qeqertarsuatsiaaniit, Enok Skadelu, Ukkusissaniit.
Ajungaasut sisamaattut akissarsitinneqartut sisamaapput tamarmik immikkut akileraatutitaqanngitsunik 5.000 koruuninik akissarsitinneqartut. Ukununnga tunniunneqarlutik: Kristian Isaksen, Alluitsup Paa. Godmann Filemonsen, Sisimiut. Qaerngâq Nielsen, Savissivik. Iver Lyberth, Maniitsoq.
