Ukioq manna apriilimi aatsaat taama kiatsigaaq
Pingaartumik Kalaallit Nunaata ilarujussuani Skandinaviamilu, kangiatalu avannarpasinnerusortaani qiterpasissuanilu apriilimi kiangaatsiarpoq, apriilimi kiattarnera agguaqatigiissillugu gradinik pingasunik qummut qaangerlugu.
Qaammatit 412-it tulleriissillugit pisarnermit nunarsuup ilaani taamaasilluni kianneruvoq.
Kangerlussuarmi pisarnermit agguaqatigiissillugu gradinik arfinilinnik apriilimi kianneruvoq, apriilillu naajartulernerani ullut ilaanni 17,3 gradinik kialluni. Kangerlussuarmi apriilimi agguaqatigiissillugu -7,8 gradinik issittaraluarpoq.
Apriilimi nalinginnaasumit ukioq manna kiannerunera pissutaalluni Sermersuup ukiup ingerlanerani aakkiartortarnera siusinnerusukkut aallartippoq.
Sermersuup ukioq manna aakkiartornera apriilip ulluisa 30-anni aallartippoq, kingullermik taamaalisoqarmat 2016-imi tamanna pilluni.