Ukioq 2013 Nunatsinni polikkikkut pingaaruteqartorujussuussaaq
![](/sites/default/files/styles/image_934x467/public/article_images/tom_sal_630.jpg?itok=OT94TEd0)
Politikkikkut suliniutissani ukioq manna suut pingaaruteqarnerussanersut, naalakkersuisoqatigiinni partiinut Inuit Ataqatigiinut Demokraatinullu illuatungiliuttunilu Siumumut apeqqutigaarput.
Demokraatit aallarniutigissavavut, siulittaasuat Jens B. Frederiksen ima oqarpoq:
- Aatsitassarsiornermik periarfisssat aallartilluarneqarnissaat pingaaruteqarluinnarpoq. Naluneqanngitsutuut qinnuteqartut arlariipput, taakkualu aallartinnissaat naatsorsuutigivarput, Demokraatit siulittaasuat Jens B. Frederiksen oqarpoq.
Aatsitassarsiornerup ukioq manna qinersinissamut pingaaruteqarluinnarnera Siumup siulittaasuata Aleqa Hammondip oqaatigaa, Siumullu amerlanerussuteqalernissaa aamma sulissutiginiarneqarluni,
- Siumup sumiiffinni tamani amerlanerussuteqalernissaa soorunami qulakkeerusupparput, pingaaruteqartumillu inuiaqatigiinni aqutsisooqqilernissaanut tunngatillugu Inatsisartuni assoruulluta sulinissarput naatsorsuutigineqassaaq. Pingaarnertullu tassaassaaq inuiaqatigiinni aningaasarsiornitsinni pisuussutitsinnit isertitaqarnissarput, aammalu inuiaqatigiinni sumiluunniit najugaqaraluartut politikkikkut naligiimmik pineqarnissaat pillugu anguniakkavut ukioq manna salliutissavavut, Siumup siulittaasua Aleqa Hammond oqarpoq.
Siumullu inatsisartunut qinersinermi amerlanerussuteqalissagaluarpat, Suliniutinut anguisuunut inatsisip ilaatigut allanngortinneqarsinnaanissaa ammaffigineqarpoq:
- Inatsit sunaluunniit inuiaqatigiinni allanngutsaalisassanngorlugu inissisimanngilaq, Inatsisartunilu ilaasortat amerlanerussuteqartut tamanna kissaatigissappassuk allanngortinneqarsinnaanissaa periarfissaajuaannartussaassaaq. Uagut Siumumi tunngaviusumik qangaaniilli isumaqartuaannarpugut pisuussutitsinnik aatsitassaatitsinnik inuiaqatigiit salliutinneqarlutik pissarsiassaat sulissutigineqartuassasoq, Aleqa Hammond oqarpoq.
Sunarpiaq allanngortinniarneqarnersoq Siumumit oqaatigineqanngilaq, partiilli qineqqusaarutissaani takuneqarsinnaajumaarluni.
Inatsimmik allanngortitsisoqassappat Nunatta tutsuiginassusaa innarlerneqarsinnaasoq, Demokraatit oqaatigaat:
- Uagut naatsorsuutiginngilarput piffissap taama sivikitsigisup iluani allannguissalluta, aamma una eqqarsaatigineqartariaqassaaq: Nunarput tatigineqarsinnaassappat, taava inatsisit nunanut allanut tunngasut sangujoraarluta sooraunami allanngorteqattaarsinnaanngilavut. Patajaatsumik ingerlatsinissarput pisariaqarpoq. Aatsaat taamaalinikkut nunarput siuarsarsinnaavarput pitsaasumik, Demokraatit siulittaasuat Jens B. Frederiksen oqarpoq.
Suliniutinut angisuunut inatsimmi suut allanngortinniarneqarnersut ersarissumik oqaatigineqannginnerat Inuit Ataqatigiinnit aamma apeqquserneqarpoq. Politikkikkut oqaaseqartartoq Aqqaluaq B. Egede ima oqarpoq:
- Suliniutinut angisuunut inatsisip allanngortinniarneqarneranut oqallinneq qineqqusaarutaannaassanngilaq. Suleqatigiit qanoq iluseqarnissaannut immaqaluunniit amerlanerussuteqalernermi aamma allanngortinniarneqarsimappat, taava suna allanngortinniarlugu oqaatigineqartariaqarpoq, Inuit Aqatigiit politikkikkut oqaaseqartartuat Aqqaluaq B. Egede oqarpoq.