Ukiakkut ataatsimiinneq: Namminersornermut naalakkersuisoqarfeqalissava?
Ullumi 2023-mi Inatsisartut ukiakkut ataatsimiinnerat ammarpoq. Politikerit Nuummi Hans Egede-p Illuaniit Annaassisitta Oqaluffianut ingerlaaqatigiipput, tassanngaanniillu Inatsisartut ataatsimiittarfiannut ingerlaqqillutik.
Tassani Naalakkersuisut siulittaasuat Muté B. Egede oqalugiarpoq, naalakkersuisullu marluk tunuarlutik.
Mimi Karlsen, peqqissutsimut naalakkersuisuusoq aamma Karl Tobiassen aalisarnermut piniarnermullu naalakkersuisuusoq.
Paarlaallugu Mimi Karlsen Inatsisartut siulittaasuattut nutaatut toqqarneqarpoq, Kim Kielsen qinigassanngorteqqinngimmat.
Kisianni immaqa suli nutaarsiassaqassaaq. Tassami nutaamik Namminersornermut Naalakkersuisoqarfiliortoqarnissaa nalunaarutigineqarsinnaavoq.
KNR-ip tutsuiginartunit paasivaa, Siumut naalakkersuisoqarfimmik pilersitsisoqarnissaa pillugu siunnersuusiorsimasoq, IA-mut isumaqatigiissutiginiagassaminnik.
IA isumaqataappat, siunnersuut sapaatip-akunnerata tulliani ataatsimiinnermi saqqummiunneqarsinnaavoq.
Siunnersuummi Siumukkormiut allapput, Kalaallit Nunaata namminersorluni naalagaaffinngornissaanut pitsaasumik ikaarsaariarnissaq annertuumik suliassaasoq, innuttaasullu tamatumani malinnaatinneqartariaqartut.
Aammattaaq aalajangiunniagassaavoq, akisussaaffiit suut Kalaallit Nunaata siulliullugit tigussanerai. Tamanna suleqatigiissitat isummerfigissavaat.
Namminersornermut naalakkersuisoqarfeqarnikuuvoq 2016-imiit 2018-imut, taamani atuunnermini taaguutigaa – namminersornermut, nunanut allanut aamma nunalerinermut naalakkersuisoqarfik.
