Ukaleq Slettemark qasoqqagami World Cup-mi peqataanngiinnalerpoq
20-nik ukiulik Ukaleq Slettemark sapaatip akunnerata tulliani Holmenkollenimi World Cup-eqataasussaagaluarpoq.
Maannali peqataaniarani nalunaarpoq inuusuttut februarimi VM-qarneranni timaata qasuummerujussuarnera suli qaangiutinngimmat.
AAMMA ATUARUK Ukaleq uniunngereerluni: Unammereernitsinni nunarsuarmi kakkannerpaat pilluaqqusiartorput
- Ukioq unammiffiusoq takillunilu sakkortuvoq qasujaassuseralu ukioq naallugu aalaakkaanissamut suli amigarpoq, Ukaleq Slettemark KNR-mut oqarpoq.
Beijingimi OL-qataaneq tamaviaarnarpoq
Ukiumi unammiffiusumi angusaani OL-mut anngunneq qaffasinnersaavoq. Tassani arnani unammeqataasuni kisiartaalluni 30-riarluni seqqornermi tamaasa eqqorpai. OL-mulli anngunniarneq sakkortuvoq.
Anngunniarnermini tamaviaarujussuareerluni juulli sioqqutilaarlugu OL-mi peqataasinnaaneq anguaa.
OL naammassiniariartoq aqqalussani Sondre ilagalugu inuusuttut VM-qarnerannut USA-mi pisumut ingerlavoq. Tassanili qasunera malunnarsereerpoq.
Ukiorlu unammiffiusoq naggaserlugu Oslop sisorartarfissuani tusaamasaasumi Holmenkollenimi World Cupimi peqataasussaagaluarpoq – tamannali tassa pisussaajunnaarpoq.
- Soorunami uggornarpoq, kisianni timinnut qasujaassutsinnullu pitsaanerpaajussaaq maanna peqataanngiinnaruma, Ukaleq Slettemark oqarpoq.
Inuusuttut Nuummi sungiusarniarpai
Ukioq unammiffiusoq pisoqarfiusimaqaaq ukiaq nunanit tamalaaneersut unammineranni IBU Cupimi normu 7-nngorami Beijingimilu OL pisut pikkunarnersaraat.
- Kingumut qiviarnermi takusinnaavara nakernerujussuanngorsimallunga tamannalu OL-mi takutippara. Aamma qasujaassutsikkut aatsaat taama inissilluartiginikuugaluarpunga. Sivitsulerami kingullermik qaffariarninniit, Ukaleq Slettemark arnani OL-qataasuni kisiartaalluni 30-riarluni seqqorami tamatigut eqquisartoq oqarpoq.
AAMMA ATUARUK Ukaleq Slettemark ukiuunerani OL-eqarnissamut peqataasussaanngorpoq
Inuusuttulli USA-mi februarimi VM-qarneranni timaa qasuummerujussuareerluni suli piariinngilaq.
Maanna nunanit tamalaaneersut unammineranni peqataanngikkallarluni qasuersaassaaq.
Uninngavissamaanngilarli. Tassami porskimi sisoraatinik oqilaniunnermi GM-qataaniarpoq tamatumalu kingorna Nuummukassaaq anaanani Uiloq Slettemark peqatigalugu inuusuttut sisoraaserluni ooqattaasarnermi sungiusassallugit.