Ukaleq Slettemark ukiuunerani OL-eqarnissamut peqataasussaanngorpoq
Sisoraaserluni ooqattaasartartoq Ukaleq Slettemark Beijinginmi ukiuunerani OL-eqarnermi peqataasussanngorpoq.
Danmarkimi timersoqatigiit kattuffiat Danmarks Idrætsforbund tusagassiuutinut nalunaaruteqarluni taama allappoq.
Danskit erfalasuat atorneqassaaq
Ukaleq Slettemark Kalaallit Nunaat Danmarkilu sinnerlugit OL-imut peqataanissaminut nuannaarpoq.
- Tanngassimaarutigisorujussuuara naalagaaffeqatigiinneq sinnerlugu unammeqataassagaama aamma danskit erfalasuat atorlugu peqataassagama, Kalaallit Nunaat Danmarkilu sinnerlugit, Ukaleq Slettemark taama oqarpoq.
AAMMA ATUARUK Ukaleq uniorani unammereerluni: OL qulakkeerpasippoq
Ukiuunerani OL-imi Danmarki sinnerlugu unammeqataasussasut 62-iupput, timersuutit assigiinngitsut tallimat unammissutigineqassallutik.
- Timersornerup iluani angusinnaasanni annersaavoq, OL ukiut sisamakkaarlugit pisarpoq, taamaattumik iluatsitsisarnissannut periarfissakka ikittuinnaapput
Ukaleq Slettemark OL imi unamminermi kisimiilluni 15 kilomerisut isorartutigisumik kiisalu naatsumut 7,5 kilometerisut isortutigisumut unammeqataassaaq.
Naatsunut unamminermi pitsaanerpaat 60-it ilaannut anngukkuni 10 kilometerisut isorartutigisumut unamminissamut anngutissaaq.
Ukiuunerani OL-erneq februaarip ulluisa sisamaannit februaarip ulluisa 20-ata tungaanut ingerlanneqassapput, tamannalu pissaaq Kinap illoqarfiisa pingaarnersaanni Beijingimi.
Danmarkip ukiuunerani OL-imut peqataatitai aatsaat taama amerlatigipput.
