Ukaleq uniorani unammereerluni: OL qulakkeerpasippoq
![Ukaleq Slettemark 2021 Ukaleq Slettemark 2021](/sites/default/files/styles/image_934x467/public/article_images/ukaleq_februar_2021.jpg?itok=lgtXhMFD)
Ukaleq Slettemark quleriarluni seqqorami uniunngilaq inersimasut nunani tamalaani unammersuarneranni IBU Cup-mi Slovakiami sisorartarfissuarmi Osrbliemi unammeqataanermini.
Aallartuni 95-nit normu 28-tut ullumi inissippoq. Beijingimilu OL-mut anngunniarneq eqqarsaatigalugu angusaq pitsaalluinnarpoq.
- OL eqqarsaatigalugu massakkut assut pitsaasumiippugut, Ukaleq Slettemark KNR-mut oqarpoq.
TV2-mi immikkut ilisimasalittut oqaluttuusartoq Kristian Bonne Wulff TV2p Facebookimi quppernerani aamma allappoq Ukaleq Slettemark Danmark sinnerlugu OL-qataasussatut oqaatigineqarsinnaalersoq. Nunarput nammineq OL-qartarnerani nunat tamalaat ataatsimititaliarsuanni ilaasortaanngimmat Danmark sinnerlugu peqataassaaq.
AAMMA ATUARUK Sisoraaserluni ooqattaasarneq: Ukaleq OL-mut periarfissagissaarpoq
- Ullut arlallit matuma siorna qulakkeereerpasippoq maannalu soorlu tassa qulakkeerluartoq, Ukaleq Slettemark naammagisimaarinnillu oqarpoq.
Ullumikkut unamminermut peqataasinnaanissaa pissanganartorsiutaaleraluarpoq. Tassami ullualuit matuma siorna unammeqataanngiinnarpoq napparsimalernini pissutigalugu.
- Idre-mi uniornanga unammeqataagama arfineq aappaatut inissippunga. Ullumili uniunngikkaluarlunga normu 28-tut inissippunga. Timima massakkorpiaq qanoq inneranut tamanna takussutissaannguatsiarpoq, Ukaleq Slettemark oqarpoq.
Danmark sinnerlugu OL-qataasussat aqqi Danmarkimi timersortartut kattuffissuata sapaatiuppat nalunaarutigissavai. Soorlumi Ukaleq Slettemark eqqarsaatigalugu nalunaarnissaq kisimi utaqqisaaginnalersoq.
Olympiadeqarnerani unammersuarfimmi aallaqataasussat tassaasussaapput nunarsuarmi kakkannerpaat tamarmik angusarissaarusoqisut.
- Qaffasissorujussuarmik inississimapput. Inuit takkutissapput ajugaaniarlutik. Ingerlaniartunik takkuttoqarnavianngilaq. Aamma nalunngilara World Cup-ertartunut suli nallersuussinnaananga. Annguppungali sapinngisaralu tamaat sukataarumaarpunga, Ukaleq Slettemark oqarpoq.