Sisoraaserluni ooqattaasarneq: Ukaleq OL-mut periarfissagissaarpoq
![Ukaleq Slettemark december 2021](/sites/default/files/styles/image_934x467/public/article_images/image_6483441_0.jpg?itok=e3QlFLAN)
Aappaagu januarip qeqqani 20-nik ukiulik Ukaleq Slettemark ilisimatinneqassaaq OL-mut anngussimanerluni.
Nunat tamalaat unammineranni IBU Cup-mi Sverigemi Idremi aamma Norgemi Sjusjøenimi anngussinnaaneq neriunaateqarlualerpoq.
Sisoraaserluni ooqattaasartut nunani tamalaani kattuffiannit Ukaleq Slettemark wildcardimik taaneqartartumik tunineqarpoq nunani tamalaa angusarisassakkani tunngavigalugit. Wildcardimillu tunineqartut pikkorinnerit qulit februarimi ukiuunerani OL-qarnissaanut toqqagaasinnaapput.
- Maanna sisamaattut inissisimavunga. Periarfissaagissaarpunga, kisianni januarip 16-ata missaani kikkut toqqagaanersut nalunaarutigineqartussaavoq, Ukaleq Slettemark KNR-mut oqarpoq.
OL-mut anngussinnaanermut maanna inissisimanera sapaatit akunnerisa marluk ingerlaneranni IBU Cup-mi angusanit tunngavilerneqarpoq unamminerit ilaanni ujaminnangajakkami. Tamanna Idre-mi unamminermi pivoq.
- Ooqattaasarnermi kingullermi pingajuattut inissikkaluarpunga tamatumali kingorna kinguariarlunga. Nukissannik amikkittoorpunga. Taamaattoq arfineq aappaattut inissinnera assorujussuaq naammagisimaarpara, Ukaleq Slettemark oqarpoq.
- Piumassusininnarpoq takusinnaallugu pikkorinnerit qanoq qanitsigalugit. Pingajuattut inissinnissamit sekundit arfineq pingasuinnaat amigaatigaakka, Ukaleq Slettemark oqaluttuarpoq.
Periarfissat takuteqqissapput
Unamminerit annertuut juulli sioqqullugu peqataaffigissavai ilaatigut Østrigimi World Cup peqataaffigissallugu. Tassani neriuutigaa naatsumut unammereernermi malersuunnermut anngussinnaassalluni tassungalu pikkorinnerit 60-it annguttarput.
Tamatuma kingorna OL-mut toqqagaassanerluni utaqqiinnartussaassavaa imaluunniit sinnattumi piviusunngornissaanut suli ukiut sisamat utaqqissanerluni.
Aatsaallu 20-nik ukioqarnera najoqqutarissagaanni suli siunissami periarfissaqaqqittarumaarpoq.
- Anngutinngitsuussagaluaraanni piffissaq ajornerpaaunngilaq. Nalunngilara inuuninni nukittunerpaaffissara suli maannakkut angusussaanagu. Peqataasinnaassagumali misigisaq nuannersorujussuussaaq, Ukaleq Slettemark oqarpoq, eqqarsarporlu OL-mut maanna peqataassaguni misilittakkat ukiuni aggersuni atorluarsinnaasani pissarsiarisinnaassallugit.