Ukaleq uniunngereerluni: Unammereernitsinni nunarsuarmi kakkannerpaat pilluaqqusiartorput
20-nik ukiulik Ukaleq Slettemark maanna ukiuunerani Beijingimi OL-rtoqarnerani 30-riarluni ooqattaasarnermi arnani uniunngitsortatuaavoq.
Uniorani unamminera kingulleq tallimanngornermi ullaakkut 7,5 kilometerimut unamminermi pivoq tassanilu normu 65-nngorpoq. Malersuunnermut anngutissaguni siulliit 60-it akornanniittussaagaluarpoq. Uniunngivikkaluarluni OL-qataanera tamaanga killeqarpoq.
AAMMA ATUARUK Slettemark uniunngitsooqqippoq, OL-imili peqataajunnaarluni
Kalaallip nakersuunera aamma unammersuarfimmi maluginiarneqarluarpoq.
- Amerlasuut pilluaqqusipput, Ukaleq Slettemark OL-rfiusumiit KNR-mut oqarpoq.
- Sisoraaserluni ooqattaasallaqinnerpaat aamma pilluaqqusiartorput. Assut pikkunarpoq taamatut iliormata. Pilluaqqusisut ilagaat Denise Herrmann aamma Tiril Eckhoff. Inuit kakkanaarsipput aammami angusaq pitsaagami, Ukaleq Slettemark oqarpoq.
Denise Herrmann ataasinngormat 15 kilometerimut unamminermi ajuaavoq aammalu Tiril Eckhoff tassaalluni sisoraaserluni ooqattaasarnermi norskit tusaamasaanersaasa ilaat.
AAMMA ATUARUK Aqagu unammeqqissasoq: Ukaleq Slettemark OL-imi aappassaanik unammilersoq
7,5 kilometerimut naatsumut unamminermi siulliit 60-it sapaatiuppat malersuulluni unamminissamut anngupput. Ukaleq Slettemarkip malersuunneq sekundinik 18-nik angunngilaarpaa ajugaasumiit minutsit pingasut sinnerlugit kigaannerugami.
Foto: Scanpix
- Illinertigut ullumi ingerlalluarneruvunga nukissaqarnerusutut misigigama. Qulit uniornagit eqqorakkit ullumikkut killiffiga pitsaanerusinnaarpasinngilaq, Ukaleq Slettemark oqarpoq.
AAMMA ATUARUK Ukaleq Slettemark OL-imi peqataarngaarnermini angusarissaartoq
Taamaasilluni Nunatsinneersup sisorarnermi siuariartupiloortup ukiuunerani OL-qataanera tamaanga killeeqarpoq ukiullu sissamat qaangiuppata ukiuunerani Italiami OL-qarnissaanut piareersarnissaq eqqarsaatigilereerlugu.
- Maaniinnera pikkunaqaaq. Naluara tamanna tamakkiisumik paasinerlugu. Kisianni ullumi ingerlaarninni unillatsiarlunga qullilitsiarpunga. Peqataanera imaannaanngeqigami unammeqaanermilu naggataarlunga, Ukaleq Slettemark oqarpoq.
AAMMA ATUARUK Ukaleq uniunngivinneq naammagisimaarlugu: Ooqattaasarneq kingulleq nalunarnersaavoq
OL-qarnerani qallunaat erfalasuat atorlugu unammeqataavoq nunarsuarmi OL-mi ataatsimiititaliap Kalaallit Nunaat nunatut namminersortutut naatsorsuutiginngimmagu.
Tullianilli unammileruni erfalasorput atorlugu sassaumaarpoq. Tamanna pissaaq inuusuttut nunarsuarmi pissartanngorniunnerat februaarip naanerani USA-mi Soldier Hollowimi pilerpat tassanilu ukioqatini unammissavai.
Aqqaluaa Sondre Slettemark aamma inuusuttut VM-qarneranni peqataassaaq.
