Ukaleq Slettemark World Cupimi aatsaat taama ingerlalluartigaaq
Ukaleq Slettemark kingulliugallartumik nunarsuarmi kakkannerpaat unammineranni World Cup-mi Sverigemi tallimanngorneq martsip 19-at unammeqataagami peqataasuni 102-ni normu 74-tut inissippoq. Taanna World Cupimi maannamut angusaasa pitsaanersaraat.
AAMMA ATUARUK Ilikkagaqarfiusumik Ukaleq Slettemark VM-mi peqataarngaarpoq
Angusanili eqqarsaatigilluareerlugit aatsaat akuersaarpai. Tassami siulliit 60-it akornanniissimasuuguni malersuulluni unamminissamut anngussimassagaluarami.
- Apuunnermi assut pakatseqqavugut. Malersuunnermut anngussinnaanissara assut neriuutigigaluarakku, Ukaleq Slettemark KNR-mut oqarpoq.
Sisoraaserluni oqilaniunnermi malersuunnermut annguttut tassaakkajupput siulliit 60-it tassungalu annguttut unamminernut allanut aamma annguttarlutik.
Inissilluarsimaneq tassani iluaqutaasarpoq aallartinnermi angusarisimasaq najoqqutaralugu aallartoqartarmat. Tassa ajugaasoq siullersaalluni aallartarpoq kingulliusorlu kingulliulluni. Taamaasilluni malersuuttoqartarpoq.
Uniorneq ataaseq
Angusanili eqqarsaatigilluareerlugit killiffinni Ukaleq Slettemarkip tulluusimaarutigaa.
- Angusat misissorluariarakkit takusinnaavara World Cupimi peqataasarninni maannamut pitsaanerpaamik angusaqarlunga. Sisorarnermi sukkanerulerpunga ooqattaasarnermilu tukumanerulerlunga, Ukaleq Slettemark oqarpoq.
AAMMA ATUARUK Sisoraaserluni ooqattaasarneq: Ukaleq quleriarluni seqqorami arfineq pingasut eqqorpai
Qoorortuuaqqaminik quleriarluni seqqorami ataasiaannaarluni uniorpoq. World Cupimilu Hochfilzenimi aamma Pokljukami angusaminut assersuussivoq.
- Hochfilzenimi aamma Pokljukami sukkanerusunut taama ungasitsigisimasuuguma malersuunnermut anngunnissaq qanillingaatsiarsimassagaluarpara, Ukaleq Slettemark nalilersuivoq.
Nuannaarutigisinnaavaalu World Cupimi aatsaat taama angusarissaartiginermigut ukiumi unammiffiusumi tullermi World Cupimi peqataaqqissinnaanngorami. Aamma OL-mut anngunnissamut piumasaqaataasut angoqqippai taamalu aappaagu OL-mut anngussinnaaneq qanilliallaqqillugu.
OL-mut anngunnermik kingulliullutik akuersisussat tassaapput Danmarkip olympiademut komiteani ilaasortat.
