Ilikkagaqarfiusumik Ukaleq Slettemark VM-mi peqataarngaarpoq

Sisoraaserluni ooqattaasartartoq Ukaleq Slettemark inersimasuni nukarlersaalluni VM-qataagami misilittagaqarlualerpoq. Maanna inuusuttuaqqani VM-qataassaaq ukioqatini unammissallugit
Ukaleq Slettemark 2021
Ukaleq Slettemarkip atisani sisoqqatit nammineq ilusilersorpai inuit kakiorneri erfalasorpullu allaliullugit Assi © : Greenland Biathlon
Allattoq Noah Mølgaard
februaarip 17-at 2021 12:19

Ooqattaasarnermi nakerneq apeqqutaalluinnarpoq 19-nik ukiulik Ukaleq Slettemark inersimasuni marlunngorneq ilanngullugu VM-qataarngaarmat Sloveniami illoqarfimmi Pokljukami.

Ooqattaasarnerni inissinnerit nikittarput. Tamannarpiarlu pissutigalugu sisoraaserluni ooqattaasartarne tv-mi nunani tamalaani millionilikkaanik isiginnaartoqartartoq Europami tv-qarfiit suleqatigiiffiat EBU nalunaarpoq.

AAMMA ATUARUK Ukaleq Slettemark siullerpaamik inersimasuni Sloveniami VM-qataalerpoq

Sisoraaserluni ooqattaasarnermi unamminerit pikkunarnersaanni 15 kilometerimut unamminermi sisamariarluni ooqattaasarnertalimmi Ukaleq Slettemarkip VM-qataanini naggaserpaa. Qoorortuuaqqamik 20-riarluni seqqorami pingasoriarluni uniorpoq. Unammineq naammassimmat peqataasunit 97-sunit normu 65-tut inissippoq.

- Illinertigut ingerlanera naammagisimaarpara, kisianni takusinnaavara ooqattaasarnermi ukkassilluarnerusariaqarlunga, Ukaleq Slettemark VM-qataanerminik nalilersuivoq.

Unammissut pikkunarnerpaaq

Inersimasuni VM-qataanini aallarnerlugu 7,5 kilometerimut naatsumut unammeqataagami peqataasunit 99-usunit normu 77-tut inissippoq.

AAMMA ATUARUK Sisoraaserluni ooqattaasarneq: Ukaleq OL-mut ummarissaarpoq

Marlunngornermi ullaap tunga 15 kilometerimut unamminermi aallartilluarpoq pallungalluni ooqattaasarnerni uniunngivilluni nikorfallunilu ataasiarluni uniorluni. Aappassaa nikorfalluni ooqattaasarnissap tungaanut pikkorinnerit 40-ut akornanni inissisimaleraluarpoq taamaattorli nikorfalluni ooqattaasarnerup aappaani marloriarluni uniorpoq tamatigullu piffissaq atorsimasaa minutsimik ataatsimik ilaneqartarluni. Uniornerit marluk inissinnermi ammut nikisitsingaatsiarpoq.

- Naggataamik ooqattaasartussanngorama arlallit saninnittut piareersaqatigaakka. Ilimanarpoq tassani allat qiviallakaavallaarlugit eqqarsaatikka allamut saatittoorsimassagikka, Ukaleq Slettemark oqarpoq.

Maanna inuusuttut Østrigimi Obertilliach-mi VM-qarnissaannut peqataajartorpoq tassanilu ukioqatini unammissavai.

- Unamminissanut qilaanaaqaanga allat uattut piginnaasaqartut unammisussanngorakkit taamaasillungalu allanut sanillersuussinnaalerulissallunga, Ukaleq Slettemark oqarpoq.

Aqqaluaa 16-nik ukiulik Sondre Aputsiaq Slettemark aamma inuusuttuaqqani VM-qataassaaq ukioqatigiinni U-19-ni unammeqataassalluni.