Ukaleq Slettemark siornatigut inuusuttuaqqani VM-qataanikuuvoq arfininngorpallu siullerpaamik inersimasuni VM-qataassalluniAssi: Grønlands Biathlonforbund

Ukaleq Slettemark siullerpaamik inersimasuni Sloveniami VM-qataalerpoq

Sisoraaserluni ooqattaasartartoq Ukaleq Slettemark nunarsuarmi kakkannerpaanut VM-mi unammisussanngorpoq.

Sisoraaserluni ooqattaasartartoq Ukaleq Slettemark sivisuumik angalareerluni arlaleriarlunilu coronamut misissortereerluni Sloveniami Pokljukamut apuuppoq.

Tassani siullermeerutaasumik sisorarnermi siuariartupiloortoq taanna 19-nik ukiulik inersimasuni nunarsuarmi pissartanngorniuteqataassaaq.

Ukaleq Slettemark World Cupimi decemberimi peqataarngaarpoq maannalu inersimasuni siullerpaamik VM-qataasussanngorluni. Nammineq neriuutigaa sapinngisani tamaat ingerlasinnaassalluni.

AAMMA ATUARUK Ukaleq IBU-Cup-mi aallartilluarpoq

- World Cupimiit allaanerulaassaaq nunat pikkorissorpassuallit amerlavallaanngitsunik VM-mi peqataatitaqartarmata. Taamaattumik angusani sumut inissikkumaarnera nalulluinnarpara, Ukaleq Slettemark oqarpoq.

Unamminissamut piareerpoq

Januarimi unammisartorfigisaminiit napparsimalerluni angerlaannarnikuuvoq qujanartumilli coronarani. Pokljuka-mi illinertigut sungiusareerpoq unamminissaminullu piareersimalluni.

AAMMA ATUARUK Sisoraaserluni ooqattaasarneq: Ukaleq quleriarluni seqqorami arfineq pingasut eqqorpai

- Neriuutigisara tassaavoq kingumut qiviarsinnaassallugu ingerlalluarsimallunga, ooqattaasarluarsimallunga kiisalu pisinnaasara tamaat ingerlarsimallunga, Ukaleq Slettemark oqarpoq.

Assammik arsarnermi VM Egyptenimi januarimi pimmat arsartut pullartamik taaguuteqartumiitinneqarpoq – tassa inunnut allanut qanillinaversaarlutik coronamik tunillatsinnissaq pitsaaliorniarlugu.

Sisoraaserlutik ooqattaasartartut aamma malittarisassat taakkununnga assigusut Sloveniami VM-qarnissaani malippaat.

- Aallarnissaq ullunik marlunnik sioqqullugu aamma aallarnissaq nalunaaquttap akunnerinik marlunnik sioqqullugu coronamut misissortippugut timmisartumillu mikkatta misissorteqqilluta. VM-p nalaani ullut pingasukkaarlugit misissortittassaagut, Ukaleq Slettemark oqarpoq.

Sisorartartut VM-ip nalaani qanermut assiaquteqassapput pisiniarfilereqqusaanatik. Qanermut assiaqutit sisorarluni illinerni akunnittarfimmilu ineeqqami taamaallaat peersimaneqarsinnaapput.

Ukaleq Slettemark arfininngorpat 7,5 kilometerimut peqataassaaq kiisalu marlunngorneq februarip 14-at 15 kilometerimut unammeqataassalluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat