Ukaleq Slettemark isorartussutsini pingasuni ajugaasoq
Grønlands Biathlon Forbund tusagasiutinut taama nalunaaruteqarpoq.
Ukaleq Slettemark Norgep kangisissuani pissartanngorniunnerni isorartussutsini pingasuni, tassa 6 kilometerimi, 3 kilometerimi 5 kilometerimilu peqataavoq, juniorit akornani nunarsuarmi pissartaq Maren Bakken ajugaaffigalugu, Norgemilu ukiuunerani unammiuaarnerni assigiinngitsuni, Norges Cupimi, siorna ajugaasoq Hedda Tretteteig aamma ajugaaffigalugu.
- Sapaatip-akunnerata naanera Ukalermut pitsaalluinnarpoq, aasaanerani sungiusarnerup ingerlalluarsimanerata tamanna takutippaa, ukiuuneranilu unammiuaarnissanut annernut neriullualersitsivoq, Grønlands Biathlon Forbund taama ilaatigut allaaserisaqarpoq.
AAMMA ATUARUK Ukaleq Slettemark nersorneqartoq
Ukaleq Slettemark, timersortartut Norgemi ilinniarnertuunngorniarfiisa ilaanni Norges Topidrets Gymnasimi, Geilomiittumi, ilinniartuuvoq, tassani ilinniarnini aappaagu naammassissallugu.
Juniorit nunarsuarmi pissartannngiunnissaannut piareersarlualeruttorpoq, siorna peqataanermini unammiuaarnerni normu 1-itut ilaatigut inissilluni, soorlu aamma normu 4-nngorlunilu normu 6-inngortoq.
