Timersorneq pillugu naliliisartoq: Ukaleq neriuuteqartitsivoq

Inuusuttuaraq sisoraaserluni ooqattaasarluni unammisartoq, Norges Cuppimi normu 1-inngortoq, Ukaleq Slettemark, nunatsinni timersornerup silarsuaani neriuuteqartitsivoq.

AAMMA ATUARUK Ukaleq Slettemark Norges Cuppimi ajugaasoq

AAMMA ATUARUK Ukaleq Slettemark VM-imi normu 4-ngorami qiasimavoq

- Qularinngilara pitsaasumik siunissami angusaqartarumaartoq, taavalu OL-imi VM-imiluunniit tusartalerumaaripput, timersorneq pillugu naliliisartoq Uju Petersen oqarpoq.

Norges Cuppimi ajugaasoq

Sisoraaserluni ooqattaasarluni unammisartoq 17-inik ukiulik Ukaleq Slettemark Norges Cuppimi normu 1-inngorlunilu Norges Cuppimi sisoraaserluni ooqattaasarnermi ukioq manna unammisaqattaarnerni ajugaasuuvoq.

Assi © : Grønlands Biathlon Forbund

Ukaleq Slettemark Norges Cuppimi sapaatit akunnerata naanerani finalertoqarmat ajugaasuuvoq. Assi: Sisoraaserluni ooqattaasartartut kattuffiat

Slettemarkilu tupaallassimaqaaq:

- Uannut angisoorujussuuvoq, arlaannaataluunniit sisorartarneq aallartimmat una uannut siulittuutigisimagaluarpagu upperinavianngikkaluarpara. Oqaasertalersinnaanngilaraluunniit, Ukaleq Slettemark oqarpoq.

Taanna ooqattaasalernermini eqqissisimanissani, aallaarialernermini qanoq anersaartornissani oqilaniuffimmilu qanoq periuseqarnissani eqqarsaatigiinnavikkamigit iluaqutigaa:

Assi © : Katuaq

Timersorneq pillugu naliliisartoq Uju Petersen.

- Ukkatarisartakkakka taakkuuginnarput. Ooqattaasarnermi eqqissisimaniarpunga, immaqa aamma allanut sanilliullunga, taamaanneralu iluaqutaasimassasoraara.

Sisoraaserluni ooqattaasartup angusarissaartarnera minnerunngitsumik avammut pitsaasumik takutitsineruvoq:

- Ukaliup taamatut takutitsinera, nunatta avataani unammisartuunini takutippaa aamma, qanoq qaffasitsigisumik nunatsinninngaanneersumik taama inissittoqarsinnaasoq, Uju Petersen oqarpoq.

Ilaqutariit timersullammaat

Ukaleq Slettemarkip angajoqqaavi, Øystein aamma Uiloq Slettemark, sisorarnermi nunatsinni nunanilu allani pissartanngortareerput, ilaqutariillu taakku timersortartutut tamakkiisumik anersaaqarnerat panianni ersarippoq: 

AAMMA ATUARUK Slettemarkip aallaasini sikaavimmut toqqorpaa

AAMMA ATUARUK Uiloq Slettemark Norge-mi pissartanngorpoq

- Angajoqqaavi timersortartuugamik nunanullu allanut unammiartortarlutik, aamma taanna takutippaa unammisartuuneq anersaaq taama pitsaatigisumik inuunermi atugarineqarsinnaasoq, Uju Petersen oqarpoq.

Unammisartullu timersuutini pikkoriffigilluakkani aalluttuarallassavaa:

- Siunissaq maannakkutut isikkoqarallartillugu ingerlaqqinnissannut kajumeqaanga, Ukaleq Slettemark oqarpoq.