Slettemarkip aallaasini sikaavimmut toqqorpaa
- Unamminissamut akunnialuinnanngortut pisarninnit pissanganeruvunga, immaqa nunat tamat unammiuaarnerinut peqataanissama kingullersarigaat nalunngeriarakku. Aallartileramali eqqissisimavunga unamminissamullu piareersimasutut misigalunga. Ingerlaarfimmi aamma ingerlalluarpunga. Sisoraatit (ippassaammat nutaajusut pissarsiarisimasakka) aamma ajunngivipput. 10 km-inut sukkaniuunnermi sukkanersaasumit minutsinik 3,17-inik arriinnerullunga apuuppunga. Siornatigut VM-ini peqataasarninni angusarisartakkama assigiinnangajappaa, ingerlaarfissallu ilungersunarnera eqqarsaatigissagaanni ujakkaarlunga ingerlaarninni piffissaq atugara naammagisimaarpara, Øystein Slettemark tusagassiorfinnut nalunaarummini allappoq.
Slettemark Kalaallit Nunaat sinnerlugu sisoraaserluni ooqattaasarneq 2001-imili ingerlatilerpaa World Cupinullu 70-it missaannut, VM-inut qulingiluanut kiisalu Danmark sinnerlugu OL-imut Vancouverimi 2010-mi ingerlanneqartumut peqataasarsimavoq. Nove Mestomi unammineq nunat tamat unammiuaarnerini peqataanerisa kingullersarissavaat. Kalaallit Nunaanni Biathlonertartut Kattuffiannik pilersitseqataasut ilaat nunat tamat akornanni unammisartuunerminik unitsitsilerpoq, ujakkaarlunili unammisartuunini piffissaq qaninnerusoq eqqarsaatigalugu ingerlatiinnarallassavaa. VM-imut Italiami ingerlanneqartussamut piffissami ungasinngittumi peqataasussaavoq.
- Sisorarluni ooqattaasartartut akornanniinneq unamminermilu adrenalinip qaffattarnera maqaasinngitsoornaviarnagu nalunngikkaluarlugu, eqqissisimakannernerusumik ujakkaartalernissara unammisalernissaralu qilanaarivakka. Timersuutilli iperavissunnginnerani sapaatit akunnerata tulliani ujakkaarluni VM-imut unammeqataassamaarpunga. Siullermik anngunniuteqataassaanga taavalu fri stilimik 10 km-inut sukkaniuteqataallunga. Tamanna angutserlugu sungiusarluaqqanerma attatiinnarnissaa neriuutigaara, taamalillunga pitsaanerit qulit akornannut inissillunga februaarillu 27-iani fri stilimik 15 km-inut unammeqataanissamut anngussinnaassallunga.
