Ukaleq Slettemark VM-imi normu 4-ngorami qiasimavoq

Estlandimi ooqattaasarnermi sapaatip akunnerata naanerani Ukaleq Slettemark normu 4-nngorpoq

Ooqattaasarluni unamminermi angusarissaarnerminut ilaatigut pissutaatippaa

- Uisakajaarnaveersaaginnarpunga ooqattaasartarfimmilu eqqissisimaniavissorlunga, ilamalu sukkanerulaartumik ooqattaasarnerannik sunnertinnaveersaarlunga. Uniornanga iginnissara aatsaat qulariunnaaraanngakku igittarlunga, Ukaleq Slettemark oqarpoq.

Nunarsuarmi pissartanngorniunnerit, VM-mi 10 kilometerimut sisamariarluni ooqattaasarnertalik normu 27-iulluni aallartippaa, tallimanngormat 6 kilometerimut normu 10-ngorpoq. Uissuumminartorli sapaammi pivoq, Ukaleq 7,5 kilometerimut normu 4-ranngormat.

 - Paasilerpara apuuteqqaartut siulliit qulit akornanniillunga, nalunngilarami qaangiisaqattaarnikuullunga. Kisianni tupaallaatigeqaara apuukkama normu 4-ngorsimallugu paasingakkulu qiavunga.

AAMMA ATUARUK Ukaleq Slettemark angusarissaaqisoq

Naak ujamittaarnissamut qanissimagaluaqaluni Ukaleq Slettemarkip tamanna pakatsissutiginngilaa.

Qummukajaat ilaanni normu 3-ngortup tunuaniippunga. Qaangeriaraluarpara, taannali uanniit oqilaneruvoq. Taamaattumik taanna tassunga naleqquppoq. 16-inilli ukiulimmut siunissamut isiginissaq maanna aallunneqassaaq.

- Anguniakkama annersaraat OL-imukarnissaq immaqalu nunarsuarmi pissartanngorlunga, Ukaleq Slettemark oqarpoq.