Ujarassiuut Nuussuup kujataani qaqqamit sisoorfiusimasoq misissoreersimaleraat
Sullorsuup qanittuaniikkuit ingammillu tamaani sineriammut qanittumiikkuit mianersoqquneqarputit.
Ilulissat avannaata Uummannallu kujataata akornanni Nuussuup kujataani qaqqamit sivinganermut sisoortoqarsimasoq juulip 17-iani paasissutissinneqareerluni, Aatsitassanut Inatsisillu Atuutsinneqarnerannut Naalakkersuisoqarfik taama nalunaarpoq.
Tamaani qaqqamit sisoorfiusimasoq naalakkersuisoqarfiup ujarassiuuisa misissoreersimalerpaat, tamaanilu qaqqamit sisooqqittoqarataannaammat tamatuma qanittuaniittut suli mianersoqquaat.
Qaqqamit sisoortup annersaa salliarnartamut meterit 550-it missaannik portutigisumiittumut sisoorsimavoq.
Sisoortup ilamernga qunnertigoorluni taavalu issortigoorluni ujaqqatigoorlunilu masarluusutigut sivinganermut sisoorsimasoq sissamulli naqqanninnani, naalakkersuisoqarfik tusagassiorfinnut nalunaarpoq.
Qunnerni appasinnerusuniittuni, ingammik siallertillugu aattulerfimmiluunniit, sisoortoqaqqissinnaaasoq, nunap qanoq issusianik ilisimasallit ilimagaat. Sisoornimerngillu immamut naqqannissinnaapput, taakkuali qanittuaniittunut taamaallaat ulorianaateqarsinnaallutik.
Tamatuma nalaani qaqqamit sisooriaannaasoqarneranik, ujaqqanik sisoortoqarsimaneranik takunnissimasut assigisaanilluunniit nalaataqarsimasut ujarassiornermik immikkoortortaqarfimmut attaveqaqquneqarput. Taakkuami paasissutissiinerat nunatsinni qaqqamit sisooriaannaasussarsinissamut iluaqutaasinnaapput.