Qaqqamit sivinganerup tungaanut sisoortoqarsimasoq – eqqaaniikkuit mianersorit
Uummannap kujataata Ilulissallu avannaata akornanni Nuussuup kujataani qaqqamit sivinganerup tungaanut sisoortoqarsimavoq. Nuussuaq Ilulissat avannaata Uummannallu kujataata akornanniippoq.
Taamaammat Sullorsuup qanittuaniittut ingammillu tamaani sineriammut qanittumiittut mianersoqquneqarput.
Aatsitassanut naalakkersuisoqarfik tusagassiorfinnut taama nalunaarput.
Qaqqamit sivinganerup tungaanut sisoorfiusoq ujarassiuut misissuleruttorpaat, aamma Uummannap, Niaqornat, Qaarsut, Ikerasaap, Saattut Ukkusissallu inui kingusinnerusukkut ataatsimeeqatigineqassapput.
Qaqqamit sivinganerup tungaanut sisoorfiusoq pineqartoq Karrat Kangerluanniinngilaq. Karrat Kangerluanni qaqqamit 2017-imi sisoortoqarnerata kingunerisaanik tassaarsuaqarpoq.
Tamaanerpiaq qaqqamit sisoortoqartareertoq
Sullorsuup qanittuani qaqqamit sivinganermut sisoorfiusoq Uummannap kujataata Ilulissallu avannaata akornanniippoq.
Tamaanerpiarlu qaqqamit sisoortoqartareerpoq.
Danmarkimi nunatsinnilu nunap qanoq issusianik misissuisarfimmeersut, tassa De Nationale Geologiske Undersøgelser for Danmark og Grønlandimeersut (GEUS), Nuussuup kujataani qaqqamit sivinganerup tungaanut sisoortoqarnerani qaammataasiamit assilisat misissorpaat.
Assilisat taakku ujarassiuunut, maanna Nuussuup qanittuaniittunut, nassiunneqarput. Tassa qaqqamit sivinganerup tungaanut sisoorfiusoq Tupaasat Kussinersuata avannaata kitaani kilometerit sisamat missaannik ungasitsigisumiittoq meterit 600-700-t missaattut portutigigaaq.
Ujarassiuut maanna Nuussuup qanittuaniittut kangerluk tamanna nakkutigaat. Tamaanilu nakkutilliissutit aamma nutarterneqassapput.
Innuttaasut ataatsimeeqatigineqassasut
Naalakkersuisut Uummannap, Niaqornat, Qaarsut, Ikerasak, Saattut Ukkusissallu inuinik qaqqanik sisoornissamut ilimanaatilinnik nakkutilliineq pillugu ataatsimeeqateqalersaarput.
Ukunani imaalisukkut:
30. juli: Uummannaq
31. juli: Niaqornat aamma Qaarsut
1. august: Ikerasak aamma Saattut
2. august: Ukkusissat
