Ujaasineq annaassiniarnerlu sapaammi aallartinneqartut

Sapaat ulloq naallugu ulappuffiusimasoq, Kalaallit Nunaanni Politiit ataasinngornermi ullaap tungaani paasissutissiissutigaat.

- SAR-imik marlunnik suliaqartoqarpoq, tassani Issittumi Sakkutooqarfik namminerlu kajumissutsiminnik suliaqartut umiatsiartunik arlalinnik ujaasisimasut, Kalaallit Nunaanni Politiit pigaartuisa pisortaat, Aputsiaq Hansen oqarpoq.

Umiatsiaarartoq maqaasineqartoq siulleq sapaammi nalunaaqutaq 00.24 politiinut nalunaarutigineqarpoq.

- Umiatsiaaraq ammaannartoq sikumut aporsimasoq nalunaarutigineqarpoq. Umiatsiaararlu arlalinnik ilaasoqarsimassangatinneqarpoq, namminerli kajumissutsiminnik ujaaseqataasut umiatsiaaraq nassaarigamikku angut ataasiinnaasimasoq paasineqarpoq, pigaartut pisortaat oqarpoq.

Nalunaaqutaq 01.10 angut ajoqusersimasoq napparsimmaviliaanneqarpoq.

Imigassaq initungaatsiartoq

Angut nunatta kujataani Ammassivimmut ingerlaarsimavoq. Angut 25-t 30-llu akornanni ukioqarpoq, imigassartorsimatillunilu umiatsiaarartoqarsimanersoq politiit maanna misissuleruttorpaat.

Inuit sisamat Paamiuniit arfininngornermi aallarsimasut maqaasineqarnerannik nalunaaqutaq 09.29 nalunaarutiginninneq nalunaarutit aapparaat.

Taakku sisamat ajunngitsut paasineqarpoq. Taakku ulittarnera tinittarneralu pissutigalugu aallarsinnaanngiinnarlutik Aasiaat Radioatigut nalunaaqutaq 14.25 namminneerlutik nalunaarutigigaat, pigaartut pisortaata oqaatigaa.

SAR-imik suliaqarnerit marluk saniatigut imigassartortoqarneranit pisut arlallit politiit nalunaarutigaat.

- Angerlarsimaffimmi eqqissiviilliortitsinerit sisamat imigassartorsimatillunilu ingerlatsinerit arlallit suliaraagut, Aputsiaq Hansen oqarpoq.