Ujaarineqartup atortorissaaruteqarani angalasimanini akiliisitaassutigisinnaagaa

Angut 58-inik ukiulik ataasinngorneq tamakkerlugu ujaarineqartoq oqartussanit akiliisitaaratarsinnaavoq.

Angut pineqartoq silarluttupilussuaq umiatsiamik 15 hiistinik motoorilimmik Ilulissanit aallarpoq. Aammattaaq GPS-imik, VHF-radiumik annanniutinillu nassataqarsimanngilaq, tamannarpiarlu pissutigalugu oqartussat ujaasititsisoqarneranut aningaasartuutigisaannut taarsiissuteqarnissaa piumasaqaatigineqaratarsinnaavoq.

Politiassistent Lars Christensen Qeqertarsuup politiivineersoq taama oqarpoq.

- Nalunaarusioreerutta tamanna politiit qullersaannit naliliiffigineqassaaq, politiassistenti oqarpoq.

AAMMA ATUARUK Ujaarineqartoq nammineq apuuppoq

Lars Christensenip aamma oqaatigaa atortorissaarutinik nassataqarani imaatigut angalaneq navianartuusoq politiillu sulinerannut ajornakusoortitsisartoq.

- Ujaasinerit taamaalillutik sivisunerusarput ajornarsigaluttuinnartarlutillu.

58-inik ukiulimmik ujaasisoqarneranut atatillugu angallatit qulimiguulillu sumiiffimmut angutip sumiiffigisamisut oqaatigisimasaanut ujaasiartortinneqarput. Umiarsuarlu alapernaarsuut Ejnar Mikkelsen sumiiffimmut ingerlaaleruttortoq angut ujaarineqartoq Qeqertarsuarmut ataasinngormat unnukkut nammineq apuuppoq.

Orsueruttoortoq

Angutip pineqartup nammineq nassuiaataa naapertorlugu nittaattupilussuunera pissutigalugu aqqutaani tammartajaarpoq. Sumiissusersiumallunilu nunamik takusassarsiorluni kaaviiartariaqarsimavoq. Naggataatigulli orsueruttoorpoq angullu 58-inik ukiulik umiatsiaaqqaminik tissukalerpoq.

Qeqertarsuup illoqarfittaa saneqqullugu imaannarmut saavigussaaleraluarpoq, anorili saqimmat illoqarfiup tungaanut ilaquttami ernumallutik tusarsiisut utaqqiffigisaannut tissukarsinnaasimavoq.

AAMMA ATUARUK 58-inik ukiullip ujaarineqarnera silap ajornera pissutaalluni ajornakusoorpoq

Angutilli atortorissaarutit eqqortut nassatarisimagaluarpagit taama ilungersunartigisumik immaqa pisoqarsimassanngikkaluarpoq.

- Radiumik nassarsimasuuguni qulimiguulimmiittut oqaloqatigisimasinnaagaluarpai. Aamma GPS-eqarsimasuuguni immaqa tammartajaarsimassanngikkaluarpoq, Lars Christensen Qeqertarsuup politiivineersoq taama oqarpoq.

Ujaarineqartoq qiialaaraluarluni ajunngitsoq, kingornalu napparsimmavimmit ikiorneqartariaqarsimanngitsoq, politiit ilisimatitsissutigaat.