Ujaasineq taamaatinneqartoq: Ujaarineqartoq nammineq apuuppoq

Angutip 58-inik ukiullip Ilulissanit Qeqertarsuarmut umiatsiamik sapaatiummat angalatillutillu apuutinngitsoortup ujaarineqarnera taamaatinneqarpoq. Ujaarineqartoq Qeqertarsuarmut nammineerluni apuuppoq.
Assi © : Rigspolitiet
Allattoq Simon Uldum -
januaarip 02-at 2018 05:07

Politiet ataasinngormat unnukkut ilisimatitsissutigaat ujaarineqartoq Qeqertarsuarmut pilersaarutit malillugit sapaatiummalli tikiffissaraluaminut nammineerluni apuussimasoq.

- Politiet nal. 1908 ujaarineqartup ilaqutaanit sianerfigineqarput, taassumalu politiinut ilisimatitsissutigaa ujaarineqartoq Qeqertarsuarmut apuussimasoq ajunngitsorlu.

AAMMA ATUARUK 58-inik ukiullip ujaarineqarnera silap ajornera pissutaalluni ajornakusoorpoq

Politiit paasitinneqarnerat naapertorlugu ujaarineqartoq anori iluaqutsiullugu Qeqertarsuup tungaanut tissularluni ingerlaarsinnaasimavoq, nunamullu niusinnarluni ilaquttaminukarsimalluni.

Angutilli ajornartorsiulerneranut suna pissutaanersoq politiinit suli erseqqissumik paasineqanngilaq.

Issittumi Sakkutooqarfik politiillu sumiiffimmi umiarsuarmik qulimiguulimmillu ujaasipput, nittaappallaarnerali pissutigalugu ujaasinertik unitsittariaqarsimallugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq