Uffe Ellemann-Jensen toquvoq

Danmarkip nunanut allanut tunngasunut ministererisimasaa Uffe Ellemann-Jensen sivisuumik napparsimareerluni 80-inik ukioqarluni unnuaq eqqissilluni toquvoq. Partii Venstre taama ilisimatitsivoq.
Nunanut allanut tunngasunut Danmarkimi ministeriusimasoq Uffe Ellemann-Jensen, Royal Greenlandip siulersuisuinut aamma siulittaasuunikuuvoq. Assi © : Baltic Development Forum/flickr
Allattoq Mads Lynge
juunip 19-at 2022 11:27

Nuliani Alice Vestergaard, meeqqanilu sisamat, Claus, Helene, Karen aamma Jakob, ernuttallu qulit qimatarai.

Uffe Ellemann-Jensenip kræfteqaleqqissimanini aviisimut Kristeligt Dagbladimut siorna oqaluttuaraa.

Rigshospitalimut ataasinngormat unitsinneqarpoq, erneralu, Venstremilu maanna siulittaasoq Jakob Ellemann-Jensen, politikerit innuttaasunik Bornholmimi ukiumoortumik naapinnittarnernerannit sisamanngormat Københavniliarpoq angunni najoriartorniarlugu.

Uffe Ellemann-Jensen DR-imi aviisimilu Børsenimi tusagassiortutut sulinikuuvoq, Børsenimi aamma aaqqissuisuulluni, Folketingimullu 1977-imi qinigaalluni, Danmarkimilu politikkikkut sulinermi pingaarutilittut kingorna inissisimalerluni.

Poul Schlüterip ministeriunerunerata nalaani nunanut allanut tunngasunut 1982-imi ministerinngorpoq, partiimilu Venstremi 1984-imi siulittaasunngorluni.

Uffe Ellemann-Jensen Royal Greenlandip siulersuisuini aamma siulittaasuusimavoq.

Nutarterneqassaaq....

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq