Ataatsimiititaliap sulinermut ilanngaat kinguartinniaraa
Ataatsimiititaliamit sulinermut ilanngaammit iluanaarutit ukiup aningaasarsiorfiusup tulliani aatsaat tunniunneqartassappata suliffillit amerlinissaat qularilluinnarpaat.
Naalakkersuisut sulinermut ilanngaammik 2020-imi januaarimi atuutilersitserusupput, ilanngaammilli naatsorsuineq ajornakusoormat ilanngaammit 2020-imi iluanaarutit 2021-imi aggustimi aatsaat tunniunneqassapput.
Tamannalu ernumanartoqartinnerarlugu Aningaasaqarnermut Siunnersuisoqatigiit siusinnerusukkut nalunaarput.
AAMMA ATUARUK Aningaasanut inatsisissatut siunnersuut: Aningaasaqarnikkut ilungersunartut arlallit
- [Innuttaasut] siunissami iluanaaruteqalaarunik sulinissaminnut kajumissuseqarnerulissanersut imaluunniit aningaasat tunniunneqarpata ilimaginngisamik iluanaaruteqartutut isigissaneraat oqaatigiuminaappoq, siunnersuisoqatigiit nalunaarusiaminni allapput.
Taamaammat ilanngaatip atuutilernissaata iluanaarutit qaammatikkaartumik tunniunneqartalersinnaanngornissaannut kinguartinnissaa ataatsimiititaliap kaammattuutigaa.
AAMMA ATUARUK Inatsisartut siunnersuutinik aningaasaqarnernut sunniuteqarsinnaasunik isummertussat
Ilanngaat atuutilerpat inuit suliffittaarunik iluanaaruteqarnerusassapput, taamaaliornikkullu suliffillit amerlanerulersinniarneqarput. Aningaasaqarnermut Siunnersuisoqatigiit naapertorlugit, ilanngaammit iluanaaruteqarnerpaajusussat ukiumut 4.000 koruuninik atugassaqarnerulissapput.
Ilanngaalli iluanaarutai ukiukkuutaartumik tunniunneqartassappata ilanngaatip kissaatigineqartutut siuariaataannginnissaa ilimanarsinnaasoq ataatsimiititaliaq allappoq. Ilanngaatilli nunatta karsianut aningaasartuutaasorujussuunissaa qularineqanngilaq.
Ilanngaat atuutilissaguni ukiumut 45 millionit koruunit 50 millionit koruunillu akornanni aningaasartuutaasarnissaa Namminersorlutik Oqartussat naliliipput.
AAMMA ATUARUK Suliffeqarnermi ilanngaat, mittarfissualiassat utoqqaallu illersuisuat
Sulinermut ilanngaat sivisuumik oqallisigineqareerpoq, naalakkersuisoqatigiillu isumaqatigiissutaanni kingullerni pingasuni anguniakkatut allaqqalluni.
Siumup, Partii Naleqqap, Atassutip Nunatta Qitornaasalu isumaqatigiissutaanni ilanngaatip 2019-imi atuutilernissaa anguniagaavoq, maannalu naalakkersuisoqatigiit isumaqatigiissutaanni 2020-mi atuutilersinneqarniarluni.
Tassalu sulinermut ilanngaatip iluanaarutit qaammatikkaartumik tunniussinnaanissaat allaffissornikkut aatsaat periarfissaalerpat atuutilernissaa ataatsimiititaliap maanna kissaatigaa.