Inatsisartut siunnersuutinik aningaasaqarnernut sunniuteqarsinnaasunik isummertussat
Inatsisartut septembarip ulluisa 20-anni aallartittumik ukiaanerani ataatsimiilerunik siunnersuutinik inuit atugaannut sunniuteqartussaasunik aamma aalajangiiffigisaqassapput. Sunnersuutit innuttaasut aningaasaqarnerannut sunniuteqartussat taakkununnga ilaapput.
Suliffeqarnermi ilanngaat.
Suliffeqarneq kajuminnarnerulerniassammat, aningaasaqarnermut naalakkersuisup Vittus Qujaukitsup, suliffeqarnermi ilanngaateqalernissaq siunnersuutigaa. Ilanngaat qanoq isertitaqarneq apeqqutaatillugu iluanaarfiussaaq.
Ukiumut 198.000 koruunit 386.000 koruunillu akornanni isertitaqartut aningaasat atorsinnaasaat ukiumut 4 .000 koruunit missaannik amerlissapput.
AAMMA ATUARUK Suliffeqarnermi ilanngaat pillugu inatsisissatut siunnersuut tusarniaassutigineqaleruttortoq
Ilanngaat appasissumik akunnattumilluunniit isertitalinnut siunnerfilerneqarmat, amerlanerusunik isertitaqartut ilanngaammit iluanaarutikinnerussapput. Isertitat amerliartortillugit ilanngaammit iluanaarutissat ikiliartussapput, 606.000 koruuninillu amerlanernilluunniit isertitaqartut iluanaaruteqassanatik.
Ilanngaatip aningaasartai 2021-mi siullerpaamik tunniunneqarnissaat naatsorsuutigineqarpoq, nunattalu karsiata ukiumut 50 millionit koruunit missaanni aningaasartuutigisassagaa naatsorsuutigineqarpoq.
Utoqqalinersiutit saniatigut isertitaqarsinnaanerunissaq
Aamma soraarnerit sulinissamik kajumissaarneqarput.
Isertitat allat amerliartortillugit utoqqalinersiutit ikiliartortarput. Utoqqalinersiutinullu ikilisaataasussaanngitsumik saniatigut isertitaqarnerusoqarsinnaalernissaa peqqissutsimut, isumaginninnermut inatsisinillu atuutsitsinermut naalakkersuisup, Martha Abelsenip siunnersuutigaa.
Aamma allanik isertitaqaleriartornermi utoqqalinersiutit ikiliartortarnerat allanngussaaq, utoqqalinersiutit ikinnerusunik ilanngarneqartalerlutik. Procenti qanoq appartigissanersoq aappaqarneq aappaqannginnerluunniit apeqqutaassaaq. Kisianni aappaqaraanni aappaqanngikkaanniluunniit utoqqalinersiutinik ikilisaanermi procenti apparneqassaaq
AAMMA ATUARUK Soraarnerussutisiaqarnermi aaqqissuussineq Siumup allanngortikkusukkaa
Siunnersuut akuersissutigineqassappat, tamanna Namminersorlutik Oqartussanut ukiumut 13.5 millionit koruuninik aningaasartuutaasarnissaa naatsorsuutigineqarpoq, ukiullu tulliata aallartinnerani atuutilernissaa siunnersuutigineqarluni.
Akiliisarnermik aaqqissuussaq
Siunnersuutilli tamarmik aningaasaqarnerulersitsissanngillat.
Inuit 30.000-it missaanniittut pisortanut akiitsui ullumi katillugit 1 milliard koruuningajaapput.
Pisortanummi akiitsorineqartut amerlanerulinnginniassammata, akiliisarnermik aaqqissuussap Ilanngaassiviup atuutilernissaa Vittus Qujaukitsup siunnersuutigaa.
Inatsisissatut siunnersuut upernaaq tusarniaassutigineqarpoq, Sulisitsisunit SIK-miillu taamani isornartorsiorneqarluni.
AAMMA ATUARUK Ilanngaassivik pillugu siunnersuut peersiuk
Ilanngaassivik atuutilissappat akiitsullit akissarsiatik tigutinnagit pisortanut akiitsumik akilerneqarnissaannut pisortanit ilanngaaffigineqaqqaartalissapput. Tassalu namminersortunut akiitsut, oqarasuaatit angallattakkanut, internetimut assigisaannullu akiligassat suli akilerneqannginnerini pisortat akissarsianik ilanngaasalissapput.
Ilanngaanermili innuttaasup qaammatip sinneranut atugassai 4.000 koruuninit ikinnerulersinneqartassanngillat. Aappariit qaammatip sinneranut atugassaat 6.000 koruuninit ikinnerulersinneqartassanngillat. Meeralinnut aningaasat atorsinnaasat meeqqamut ataatsimut 1.600 koruuninik amerlanerusassapput.
Pisortanut akiitsoqaruit akiitsunullu akilinngitsuukkanut ukiut tallimat iluanni suliat pingasut ilinnut tunngassuteqarpata Ilanngaassivimmut ilanngunneqassaatit.
Ilanngaassivilli maanna akiitsooreersut akilersortinneqarnissaannut atorneqarnavianngilaq, siunissamili akiitsorineqalertussanut atorneqartassalluni.
Ilanngaassiviup 2021-mi atuutilernissaa siunnersuutigineqarpoq 2022-miillu ukiumut 30 milliuunit koruuninik isertitsissutaasarnissaa naatsorsuutigineqarluni.
Pilersinneqarnissaali 30 millionit koruuninik aningaasartuutaassangatinneqarpoq, ingerlanneqarnissaanullu aningaasartuutissat ukiumut 7,5 millionit koruunit 9,5 millionit koruunillu akornanniissangatinneqarlutik
