Soraarnerussutisiaqarnermi aaqqissuussineq Siumup allanngortikkusukkaa

- Ullumikkut soraarnerussutisiallit koruunikkaartumik ilanngartserfigineqartarput, annikitsuinnarmilluunniit suliaqalaarpata. Tamanna taakkununnga iluarpallaanngilaq aamma inuiaqatigiittut isigalugu akuersaaruminaatsuulluni. Tassami sulinissaq soraarnerussutisiaqartunut akilersinnaajunnaaraangat taarsiullugu avataaniit sulisussanik akisoorujussuarnik aallertariaqalersarpugut, Siumumeersoq Vivian Motzfeldt tusagassiorfinnut nalunaarummi taama tunngavilersuivoq.

Tamanna tunngavigalugu soraarnerussutisiaqarnermi aaqqissuussineq Siumup allanngortikkusuppaa, taamalilluni soraarnerussutisialik qanorluunniit saniatigut akissarsisaraluaruni tunngaviusumik soraarnerussutisiaqartuaannarsinnaanngorlugu.

Massakkutut itsillugu aappariit soraarnerussutisiallit akornanni aappaa atorfeqarsimagaangat ilanngaanneqartarput, tamannalu Siumup allanngortikkusuppaa.