Suliffeqarnermi ilanngaat pillugu inatsisissatut siunnersuut tusarniaassutigineqaleruttortoq
Suliffeqarnermi ilanngaatip nunatsinni atuutilersinneqarnissaanut siullerpaamik alloriartoqarpoq. Suliffeqarnermimmi ilanngaatip ilusissaanut inatsisissatut siunnersuut Aningaasaqarnermut Naalakkersuisoqarfiup maanna tusarniaassutigileruttorpaa.
Suliffeqarnermi ilanngaatip isertitaqassutsip annertussusaa aallaavigalugu annertusiartuaartinneqarnissaa siunnersuutaavoq, inuit 180.400 aamma 350.400 koruunillu akornanni isertitallit ukiumut 9600 koruuninik suliffeqarnermi ilanngaateqarnissaat siunnersuutigineqarluni.
Aningaasarsiat taava ukiumut 4128 koruuninik taava amerlanerussapput.
350.400 koruunit sinnerlugit ukiumut isertitaqaraanni suliffeqarnermi ilanngaat milliartussaaq, isertitallu 550.000 koruunit sinnerpagit suliffeqarnermi ilanngaateqarunnaartoqartarluni.
45-50 millionit koruunillu akornanni naleqassaaq
Suliffeqarnermi ilanngaat pillugu oqallittoqangaatsiarpoq, assersuutigalugu Inatsisartunut qineqqusaarnermi kingullermi Siumup qineqqusaarutigaa, ilanngaatillu 2019-imi atuutilersinneqarnissaa neriorsuutigineqarluni.
Suliffeqarnermili ilanngaatip atuutilersinneqarnisssaa kinguartinneqarpoq, Namminersorlutik Oqartussat aningaasarsianut akileraartarnermullu periusissiaanik allannguisoqartariaqassagami. Aningaasaqarnermut taamanikkut naalakkersuisoq Pele Broberg taama nassuiaateqarpoq.
Suliffeqarnermi ilanngaatip aappaagu 2020-mi atuutilersinneqarnissaa siunnersuutaavoq, Namminersorlutillu Oqartussat akileraarutitigut isertitaasa ukiumut 45-t aamma 50-it millionit koruuninik ikinnerulernissaannik eqqoriarneqarluni.
AAMMA ATUARUK Sulinermut ilanngaat 2020-utinnagu atuutilersinneqarsinnaanngilaq
