Tyrkiami qaartartumeerinerit
Qaartartumeerisoqaqqippoq. Tyrkiami takornariaqartarfiit ullut aappassaat qaartartumeeriffigineqarput:
Antalyap qeqqani inuppassuit angallatileruttorneranni kaffisortarfiup silataani sisamanut tanneq arfineq-pingasunngorluinnartoq qaartartoq tassanngaannaq qaarpoq.
Qaartartoq qaarniariartoq kaffisortarfik arlalinnik neriniartarfittalik ikuallalermat nakorsap biilii qatserisartullu aggersarneqapallapput. Qaartartup qaarnerani toqusut neriniartarfimmiissimapput.
Tyrkiami ullup unnuallu kingulliup iluani arlaleriarluni qaartitsisoqaqattaarpoq. Feeriariartarfimmi Marmarisimi unnuap qeqqarluinnalersoq ippassaq unnukkut qaartitsisoqarpoq. 21-t tassani ikiligaapput. Taanna sioqqutitsiarlugu Istanbulimi atuarfiup eqqaani qaartitsisoqarmat arfinillit ikiligaapput.
Antalya Marmarissilu ukiut tamaasa Europamiit Ruslandimiillu millionilippassuarnit feeriarfigineqartarput. Tyrkiami oqartussat maanna sineriak tamakkerlugu isumannaallisaanertik sukaterifigaat.
Qaartartumeerinerit arlaannaanilluunniit suli akisussaaffigineqarumanngillat. Kurderit qaartartumeerisimasinnaasutut ilimagineqarput.
Danskit nunanut allanut ministereqarfiata Tyrkiamut angalaniartut malittarisassiuunneqarneri allannguiffigerusunngikkallarpai. Tyrkiamut angalaniartut Tyrkiami qaartartumeerisoqartarneranik ilisimatinneqartassapput angalanissaaminnillu nangaasaarneqartassanatik.
