Tyrkia Sverigep NATO-mut ilaasortanngornissaanut akuersisoq
Sverigep NATO-mut ilaasortaanngornissaata Tyrkiamit akuerineqarnissaa ataasinngornermi unnukkut iluatsinneqarpoq.
NATO-p qullersaa Jens Stoltenberg tusagassiortunik Vilniusimi katersortitsinermi taama oqarpoq.
Tyrkialli inatsisartuisa Sverigep ilaasortanngornissaata atuuttussanngortinnissaa qaqugu taasissutigissaneraat eqqoriarusunngilaa, suliat taamaattut sivisusarmata.
Taamaammat svenskit NATO-mut ilaasortanngornissaminnut, NATO-llu aalajangersagaani immikkoortortat tallimaannut ilanngunneqarnissaminut suli utaqqisariaqassapput.
Immikkoortortat tallimaat malillugu nuna NATO-mut ilaasortaq saassunneqarpat nunanit NATO-mut ilaasortanit allanit illersorneqassaaq.
Sverigep ilaasortanngornissaata aamma Ungarnip inatsisartuinit atuuttussanngortinneqarnissaa amigaataavoq. Tyrkiamilli isumaqatigiissuteqartoqarmat, tamatuma qanittukkut pinissaa naatsorsuutigineqartoq, Stoltenberg oqarpoq.
Tyrkiap EU-mut ilaasortanngornissaanut apeqqut Erdoganip isumaqatigiinniarnerni ilannguppaa.
Tyrkialli EU-mut ilaasortanngornissaanut suliaq sivisussaaq, EU-milu nunat arlallit akerliullutik. Erdoganilu Vilniusimi ataasinngormat ataatsimiinnermi neriorsorneqanngilaq.
