Sverigep NATO-mut ilaasortanngornissaa Riksdagenimi akuersissutigineqartoq
Sverigep nunat killiit illersoqatigiiffiannut, NATO-mut, ilaasortanngornissaa pillugu Sverigemi inatsisartuni Riksdagenimi ippassaq pingasunngornermi taasisoqarmat, 269-it akuersipput 37-llu akerliullutik.
Sverigep arlaannaannulluunniit ukiuni kingullerni 200-ni attuumassuteqanngittarnera taamaasilluni tamaanga naavoq.
Riksdagenimi akunnerni arfinilinni oqallittoqareersorlu taasisoqarpoq.
Sverigemi inatsisartuni partiit arfineq-pingasuusut akornanni partiit marluk, Vänsterpartiet (V) Miljöpartietilu (MP), Sverigep NATO-mut ilaasortanngornissaanut akuersinngillat.Riksdagenimi ilaasortat 43-t taaseqataanngillat.
Naak Sverigep NATO-mut ilaasortanngornissaa qulakkeerneqanngikkaluartoq, ilaasortat Riksdagenimi taasineq naammassimmat ersaartaapput.
Sverige NATO-mut ilaasortanngussappat, nunat NATO-mut ilaasortat 30-usut tamarmik akuersisariaqassapput. Tyrkiami Ungarnimilu inatsisartut Sverigep ilaasortanngorsinnaanissaa akuersissutigeqqaartariaqarpaat.
Ungarnimi inatsisartut Sverigep ilaasortanngorsinnaanissaa pillugu taasingajalerunarput, Tyrkialli præsidentiata Recep Tayyip Erdoganip Sverigep NATO-mut ilaasortanngorsinnaanissaa akuerissaneraa suli ilisimaneqanngilaq. Finlandip NATO-mut ilaasortanngorsinnaanissaa Tyrkiap akuersissutigereerpaa.
