Finlandimi inatsisartut Finlandip NATO-mut ilaasortanngornissaanut akuersisut
Finlandip nunat killiit illersoqatigiiffiannut NATO-mut ilaasortanngornissaa pillugu Finlandimi inatsisartuni Rigsdagenimi ullumi pingasunngornermi taasissutigineqarmat amerlanerussuteqartut akuersisut, nutaarsiassaqartitsivik TT allappoq.
184-it akuersipput, arfineq-marlullu akerliullutik.
Finlandip præsidentiata Sauli Niinistöp siunnersuut taamaasilluni atsiuunnariannaanngorpaa.
Finland arlaannaannulluunniit ukiorpassuanngortuni attuumassuteqarsimanngeriarluni nunat killiit illersoqatigiiffiannnut ilaasortanngorsinnaalerpoq.
Suliaq aallartereerpoq. Nunat NATO-mi ilaasortat, Tyrkia Ungarnilu minillugit, Sverigep Finlandillu illersoqatigiiffimmut ilaasortanngorsinnaanissaat akuersissutigereerpaat.
Nunat marluk taakku NATO-mut ilaasortanngorsinnaanissaat Ungarnimi inatsisartut ullumi pingasunngornermi oqallisigilerpaat.
Nunat NATO-mi ilaasortatut akuersissutigineqassappata, NATO-mi ilaasortat tamarmiullutik akuerseqqaartariaqassapput.
Tyrkia nangaassuteqarpoq, Finlandilli ilaasortanngornissaa akuersissutigissagunarlugu, Sverigeli utaqqisariaqassalluni.
Finlandimi inatsisartuni taasisoqarnissaanut tunngaviliisussatut isumaliutissiissut pillugu inaarutaasumik oqallittoqarmat ilaasortat marluk akerliupput, naggataatigulli ataasiinnaq akerliulluni.
Ataaseq akuersinaniluunniit akerliunngilaq, arfineq-marlullu taaseqataanatik.
Finlandip NATO-mut ilaasortanngornissaanik taasisoqarmat amerlanerussuteqarnissaq taamaallaat piumasaqaataavoq. Sapinngisamilli siammasissumik tapersersorteqarnissaq, ministeriunerup Sanna Marinip naalakkersuisoqataasalu Finlandillu præsidentiata Sauli Niinistöp kissaatigaat.
Isumannaallisaaneq pillugu Finlandimi oqallinneq Ruslandip Ukrainemik siorna februaarimi saassussilernerata kingorna allanngorluinnarpoq.
Finlandip NATO-mut ilaasortanngornissaa Finlandimi innuttaasut akornanni amerlanerussuteqartunit ukiorpassuarni akerliuffigineqarpoq. Russilli Ukrainemik saassussinerisa kingorna tamanna allanngorluinnarluni.
Finlandip, Ruslandimut 1300 kilometeritut isorartutigisumik killeqarfillip, ulorianartumik inissisimasinnaaneranik tamanna ersersitsivoq. Politikkikkut ernumanartutut inissisimalinnginnissaq pillugu NATO-mut ilaasortanngortariaqarnissaq eqqarsaatersuutigineqalerpoq, ajornerpaammimmi pisoqassappat Rusland Finlandimik saassusserataannaavoq.
