TV-kkut kalaallisut ilinniarusuppit?
KNRip aallakaatitsinngiffia atorlugu tv-kkut oqaatsinik ilinniartitsisoqarsinnaagaluartoq Demokraatineersoq Jørgen-Ole Nyboe Nielsen aamma Naalakkersuisut isumaqarput.
Taamaattoq suli misissorneqarsimanngilaq ilinniartitsinermut atugassanik aallakaatitassiorneq qanoq akeqassanersoq suliffeqarfillu sorleq aallakaatitassiat suliarinerannik aningaasaliisuussanersoq.
- KNR TV-mi piffissap aallakaatitsiffiusinnaasup paasissutissanut suungaluartunulluunniit ilinniartitsinermullu atorneqarnissaa pilerinartorujussuuvoq, periarfissallu ilagisinnaavaat kalaallisut, qallunaatut tuluttullu ilinniartitsineq, Ilaqutariinnermut, Kulturimut, Ilagiinnut Naligiisitaanermullu Naalakkersuisoq Mimi Karlsen oqarpoq.
Demokraatit sinnerlugit Inatsisartuni ilaasortaq Jørgen-Ole Nyboe Nielsen paragraf 37 naapertorlugu apeqquteqarpoq KNR TV aqqutigalugu oqaatsinik ilinniartitsinissamut periarfissat ujartorlugit.
TV Nunatsinni najugallit amerlanersaasa takusinnaavaat atuisunullu akikitsuuvoq. Mimi Karlsenip taakkartorpai tuluit tv-qarfiata BBCp misilittagarilersimasai tassani tv aamma internet akuleriisillugit ilinniartitsineq misilittagaqarfigineqarluarmat.
TV-kkulli ilinniartitsinerup sanngeequtaatut taaneqarpoq paasissutissat atuisumut taamaallaat ingerlasuummata tusagasseeriaatsit allat soorlu internet aamma smartphones atuisut nassitsisullu imminnut apereqattaallutillu akinissaannut periarfissiisartut.
Taamaattoq KNR TV-mi oqaatsinik ilinniartitsisalernissamut aqqutaa takivoq tamanna periarfissatut atorneqalissappat.
- Oqaasilerisut sulinissamut tunngavissat aaqqissuutussaavaat, taakkualu ilinniartitsinermi tunngaviusussaq, allatassat, nipimik immiussineq allagartalersuinerlu, pilerisaarutit, assilissat nipillu immiunnerat kiisalu aaqqissuineq, TV-kkoortussamik aaqqissuussinermi suliassat ilaannai eqqaassagaanni, isumagisussaavaat, Mimi Karlsen allappoq.
Namminersorlutik Oqartussat misilittagaqarfigereerpaat aallakaatitassiortartut namminersortut iminneqartarnerat. Assersuutigalugu Aatsitassat pillugit pisortaqarfiup aatsitassarsiorneq pillugu aallakaatitassiarititaa ataaseq 200.000 koruuninik akeqarsimavoq.
Mimi Karlsenilli tikkuanngilaa tv-kkut ilinniartitsisoqartalissappat aallakaatitassiat atorneqartussat kikkut aningaasalersussaneraat.
