Tusassip nipilersukkanik nunatsinneersunik appisimaartarfik pilersikkaa
Nunatsinni nipilersortunik nuannarisalinnut ullumimit sioqqutsisumik juullimut tunissutissaqalerpoq.
Tusassimmi nipilersuutinik appisimaarfik nutaarluinnaq nunatsinneersuinnarnik appisimaarfiusinnaasoq pilersinniarlugu nalunaarutigereernikuuaa. Taannalu maanna piareerpoq.
Oqarasuaatikkut internettimullu attavinnik nioqquteqartoq tusagassiuutinut nalunaarummi allappoq.
Tusass Music nipilersukkanik appisimaarfiuvoq, tassani nipilersukkat kalaallisoortut 4.000-init amerlanerusut ataatsimut katersorneqarput, nipilersuutit nutaat pisoqaanerusullu soorlu Nanook, Inuk aamma Rasmus Lyberth ilaapput.
Taamaaliornikkut app-ip inuiaqatigiit nipilersukkanik kalaallisoortunik pisoqqanik nutaanillu nassaarinneqqissinnaanissaat qulakkiissagaa, Tusassip niuernermut pisortaa, Nikolaj Christoffersen tusagassiuutinut nalunaarummi oqarpoq.
- Tusass Music tassaavoq Kalaallit Nunaanni nipilersukkanut eriagisassanut qangaaneersuniit nutaaliaasunut isaaffik nipilersukkanik Kalaallit Nunaanneersunik assigiinngitsorpassuarnik imaqarsinnaasoq. Tusass Music kalaallit nipilersugaataannik ukiorpassuit ingerlanerini nipilersuusiarineqartarsimasunik piujuartitseqataassaaq, aammali sanaajuvoq nipilersugassat ullumikkut siunissamilu sananeqartussat eqqarsaatigalugit, taanna oqarpoq.
Tusass naapertorlugu nipilersukkat kalaallisoortut siaruarsimangaatsiarlutillu tusarnaarnissaat ajornarsinnaasarsimavoq, tamannalu nipilersuutinik appisimaarfiup allanngortissavaa.
Tamatuma saniatigut nipilersortartut tusarnaartartunut misigisassanik nutaanik pilersitsinissaat anguniagaasoq, Tusassip siulersuisuini siulittaasoq, Ulrik Blidorf tusagassiuutinut nalunaarummi oqarpoq.
- Tusass Music Tusassimut iluanaaruteqangaatsiartitsissanngilaq – anguniagaavorli iluanaarutit nipilersortartunut tuttarnissaat, taamaalillutik nipilersornermik piginnaasallit amerlanerusut ineriartortinnissaanut, nipilersukkanik nutaanik pilersitsinissaannut periarfissiissaaq, minnerunngitsumillu piginnittunut – tassa kalaallinut inuiaqatigiinnut misigisassanik nutaanik pilersitsissaaq.
Nipilersortartut nangaasimasut
Nipilersortartut akornanni nipilersuutinik appisimaarfiup nutaap pilersinneqarnissaanut atatillugu assigiinngitsunik isumaqartoqarsimavoq.
Kalaallit nipilersortartut peqatigiiffianni siulittaasup, Georg Jensenip Tusass Musicip nipilersortartut nipilersugaat kisermaaffigilissagai ernumanartillugu novembarimi oqaatigaa.
Tamanna Tusassip niuernermut pisortaata, Nikoaj Christensen novembarimi oqaatigaa.
- Nipilersortartutut erinniortartulluunniit Tusass Music-imut ilanngutissagunik assersuutigalugu Spotify Tusass Music-iluunniit arlaat toqqartariaqarpaat, Tusass Music toqqarniaraanni nipilersukkat Spotify-imiittut Danmarkimiit Nunatsinniillu tusarnaarneqarsinnaanerat peerneqartariaqarpoq.
Nipilersortartulli nipilersukkatik nunani allani tusarnaarneqarsinnaatikkunikkit nipilersukkat Tusass Music-imiikkaluarlutik tusarnaarneqarsinnaassapput.
