Tusagassiuinermi sulisut peqatigiiffiat Peter Olsen pillugu: Ajornartorsiut ilungersuutinngilaa
![](/sites/default/files/styles/image_934x467/public/2023-05/TIL%20RAV%20Interview%20Oline%20TP%20310523%20Still.jpg?itok=MNTB0LfK)
Peter Olsenip (IA) Ilinniartitaanermut, Kultureqarnermut, Timersornermut Ilageeqarnermullu naalakkersuisutut ippassaq tunuarniuteqarnera tupaallaatigineqangaatsiarpoq.
Tusagassiuinermili Sulisut Peqatigiiffiata (TP-p) siulittaasuata, Oline Inuusuttoq Olsenip tunuarnera neriuutissaqalissutigaa:
- Eqqaamassavarput allannguinerit piffissartornarlutillu suliaqarfiusarmata. Neriuppunga nutaamik atuuttoqarlerpat tamanna ilorraap tungaanut ingerlanerussasoq, taanna KNR-imut oqarpoq.
Tatiginnikkunnaarnermik taasisoqarniartoqartoq
Kalaallit tusagassiortut siunissaat pillugu apeqqarissaartoqarnerani Peter Olsen tunuarniarluni aalajangerpoq.
Inatsisartuni partiit arlallit tusagassiortut kalaallisut oqaasillit amigaataanerannut atatillugu isumaginninnermik ilorrisimaarinninnginnertik oqaatigaat.
Ilorrisimaannginneq tamanna Inatsisartuni partiit arlallit tatiginnikkunnaarnermik taasinialernerannik kinguneqarpoq, tassa politikerimut pineqartumik tatiginninnerlutik taasisussanngorlutik.
Taasisoqannginneranili unikkallartoqarpoq, tassanilu Peter Olsen nammineq tunuarniarluni aalajangerpoq:
- Ilinniartitaanermut, Kultureqarnermut, Timersornermut Ilageeqarnermullu Naalakkersuisup Peter Olsenip inatsisartut unikaallassimatsiarneranni tunuarniunni nalunaarutigaa. Taamaattumik akisussaaffigisai uanga tigugallartariaqassavakka, naalakkersuisut siulittaasuat, Múte B. Egede (IA) tamatuma kingorna oqarpoq.
Akissarsiat ajornartorsiutaanerpaasut
Oline Inuusuttoq Olsen aperigaanni KNR-ip nutaarsiassaqartitsiviani tusagassiortut akornanni akissarsiaqartitsineq pingaartumik oqallinnermi pingaarnerpaapput:
- KNR-immi nutaarsiassaqartitsiviani tusagassiortut kiisalu pisortani attaveqaqatigiinnermi suliaqartut akissarsiaat sanilliuppagut. Tassani assigiinngissutsit ersaripput, tassa KNR sulisunik atuuffinni allaniittunut sanilliullugit isumaqatigiissutini assigiinniittunik tigumminninniarnissamut periarfissaqanngilaq.
Allanilli aamma ajornartorsiuteqartoq, Oline Inuusuttoq Olsen oqarpoq:
- KNR-ip nutaarsiassaqartitsiviani pissutsit piffissami sivisuumi ilungersorfiupput. Tamanna aningaasaqarnerup piffissami sivisuumi ilungersunarneranut takussutissaavoq. Sipaarniarnerullu tusagassiortut tusagassiornermillu suliaqartut nukingerlutik sulisariaqarnerannik kinguneqarpoq.
Neriorsuinerlunnerit
Peter Olsenip suleqatigiissitamik KNR-ip siunissaanik aaqqiissutissatullu periarfissanik saqqummersitsisussamik pilersitsiniarnini 2022-mi juunimi neriorsuutigaa.
Suleqatigiissitarli suli pilersinneqanngilaq. Tamatumalu naalakkersuisup nutaap atuutilernerani attannissaa pingaaruteqartoq Oline Inuusuttoq Olsen erseqqissaavoq:
- Susassaqarfimmi suliassamik kivitsinani tunuarpoq. Ajornartorsiutaasunut aaqqiissutissamik nassaartoqanngilaq. Nutaamik naalakkersuisoqalerpat nangitsisoqarpat tamanna eqqaamassavarput. Naalakkersuisunngortussap ajornartorsiutaasunik ilungersuussilluni suliaqarnissaa pingaaruteqarpoq, taanna oqarpoq.
Ilinniartitaanermut, Kultureqarnermut, Timersornermut Ilageeqarnermullu naalakkersuisunngortussamut suna naatsorsuutigaajuk?
- Ajornartorsiutaasut aaqqiivigineqanngillat. Aaqqiissutissarsiornissamut kivitsisoqanngilaq. Susassaqarfimmi tulliuttup suliamik ilungersuussilluni iliuuseqarnissaata eqqaamanissaa pingaaruteqarpoq.