Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen tunuarpoq
- Ilinniartitaanermut, Kultureqarnermut, Timersornermut Ilageeqarnermullu Naalakkersuisup Peter Olsenip inatsisartut unikaallassimatsiarneranni tunuarniunni nalunaarutigaa. Taamaattumik akisussaaffigisai uanga tigugallartariaqassavakka,
Naalakkersuisut siulittaasuat Múte B. Egede Inatsisartut oqaluttarfianni marlunngornermi unnukkut taama oqarpoq.
Tusagassiortut kalaallit siunissaat Inatsisartuni apeqqarissaarluni oqallisignneqarnerani Peter Olsen Ilinniartitaanermut, Kultureqarnermut, Timersornermut Ilageeqarnermullu Naalakkersuisuunera oqaluttuaannanngorpoq.
Inuiaqatigiit akiliipput
Peter Olsen kalaallisut oqaluttunik tusagassiortussaaleqinermut iliuuseqannginnera pillugu Inatsisartuni partiit arlallit isornartorsioreeraannilu tunuarniarluni nammineerluni aalajangerpoq.
Demokraatinersoq Nivi Olsen isornartorsiuisunut ilaavoq:
- Pakatsisitsisimaqaaq. KNR-umullu tunngatillugu suliassani kivissimanngilaa.
Marsi qaammat Demokraatineersup Nivi Olsenip oqallissaarutigaa Peter Olsen tusagassiortoqarneq pillugu akiumaataarnerarlugu. Maannalu tassa naammagittarneq tamaanga killeqarpoq kinguneqartitsisoqarporlu:
- Qaammatini qulingiluani neriorsuutigisimasamik suleqatigiissitamik pilersitsisinnaasimanngikkaanni suna peqqutaanersoq tamanut nassuiaanissaq pisussaaffigineqartariaqaraluarpoq. Kisiannili Ilinniartitaanermut, Kultureqarnermut, Timersornermut Ilageeqarnermullu Naalakkersuisoq nipaqanngivippoq, Nivi Olsen inatsisartuni saqqummiussinermini taama ilaatigut oqarpoq.
Neriorsuutit eqquutinngitsut
Aatsaalli tamanna pillugu oqallittoqanngilaq, tusagassiortunimmi kalaallinik amigaateqarneq pillugu Inatsisartuni oqallittoqartareerpoq.
Aviisi Fagbladet juunimi 2022-mi allaaserisaqarpoq, KNR-mi nutaarsiassaqartitsvimmi sulisunik amigaateqarneq peqqutigalugu nutaarsiassiinerit ikilisinneqartariaqarsimasut.
Taamanili Kultureqarnermut naalakkersuisoq Peter Olsen neriorsuivoq tamanna pillugu suleqatigiissitalianik pilersitsiniarluni, taakkulu KNR-imi tusagassiortunik kalaallinik amerlanerusunik qanoq ililluni kajungilersitsinissamik eqqarsaqatigiittussaaaniaraluarput, tassa suleqatigiissitat taakku Inatsisartut ippassaq ataatsimiinnissaat sioqqullugu suli pilersinneqarsimanngitsut matumani eqqartorneqarput.
Peter Olsenip tatiginnikkunaarnermik taasissutigineqarnissaa sioqqullugu Inatsisartut unikaallapput, piffissamilu tassani Kultureqarnermut, Timersornermut Ilageeqarnermullu Naalakkersuisup Peter Olsen tunuarniarluni nammineerluni aalajangerpoq:
Peter Olsen facebookimi quppernermini ima allappoq:
- Naalakkersuisutut Inatsisartunit apeqquserneqarnera tusarnaarpara aammalu sapinngisannguara tamaat suliassara kivittarsimallugu ilisimallugu.
