Tusagassiorfinni oqaatsit iluamik atorneqanngillat

Tusagassiuinermik suliallit kattuffianni siulittaasup Mariia Simonsenip Nunatsinni tusagassiorfiit assigiinngitsut KNR-illumi oqaatsinik iluamik atuinnginnerat sakkortuumik isernortarsiorpai. Tusagassiorfiillu aqutsisui Kalaallisut, danskillu oqaasinik pimoorussinerullutik ingerlatsinerusariaqarneranik Tusagassiuinermi sulisut kattuffiannit kajumissaaruteqarluni.

Allattoq Peter Troelsen, Salome Hansen, Jette Andersen

aggustip 09-at 2012 13:46

Tusagassiat saqqummersinneqartut kukkunneqartarput, tusagassiorfiillu oqaatsinik atuinerat kimikilligaluttuinnartoq ilutigalugu nutserinersuaq aamma atugaagaluttuinnarpoq. Siornatigutulli oqaatsinik pingaartitsineq atuutinngilaq, tamannalu allanngortittariaqarpoq.

- Tusagassiorfinni oqaatsinik atuineq ajornartorsiutaavoq. Sipaarniarnermillu tunngaveqartumik oqaatsigut sunnigaapput. Tusagassiortut Kalaallit Danskillu oqaasiinik sungiussisimanngitsutut isigineqarsinnaapput. Tamannalu ilinniarfeqarfinni oqaatsinik ilinniartitsinerup pitsaannginneranik tunngaveqarpoq. Aqutsisut oqaatsit pitsaanerusumik atorneqarnissaannik iliuuseqartariaqarput. Isornartorsiuineralu tusagassiortunut isornartorsiuinerunngilaq, aqutsisunulli saaffiginnittuulluni. Tusagassiortut peqatigiiffiannit tamanna iliuuseqarfiginiartarsimagaluarparput, tamatumanili aqutsisut pimoorussisumik peqataarusuttut atorfissaqarput. Tamannalu pillugu tusagassiorfeqarfiit oqaatsit pillugit politikkeqalernissaannik kajumissaarpakka, Tusagassiuinermi sulisut peqatigiiffianni siulittaasoq Mariia Simonsen taama oqarpoq.

Mariia Simonsenip oqaatsit pillugit oqaatigisai KNRi-imit ilaatigut ilalerneqarput.

- KNR aallakaatitsivittut innuttaasunik sullissiviusutut oqaatsitta paarilluarnissaannut ineriartorteqqinnissaannullu pingarutilimmik inissisimaffeqarpoq, aammali oqaatsitsinik atuiniarnitsinni unammilligassarpassuaqaratta nassuerutigisariaqarparput. Unammilligassat tamakkua meeqqat atuarfianni oqaatsinik ilinniartitsinermi, GU-mi, ilinniarfinni ingerlaqqiffiusuni aammalumi inuiaqatigiinni tamani oqaatsinik atuinermit aallaaveqarput, nutaarsiassaqartitsivimmi pisortaq Mikkel Bjarnø Lund oqarpoq.

- Tassalu KNR-imi oqaatsit atorneqartut pitsaassusaat appasikkaangata, tamanna meeqqat atuarfiata atuartumi ilinniarfiilllu ingerlaqqiffiusut ilinniartumik kalaallisut naammattumik qaffasissuseqartumik ilinniartinneqarnissaat naammassineq ajornerannik peqquteqarpoq. Tamannalu misigiuartarparput, aammali ulluinnarni ulapaarfiusuni iluarsiuminaatsittarlugu.

- Oqaatsit paarilluarnissaat ineriartortittuarnissaat KNR-imi aallutariuarparput. Oqaatsinik atorneqartunik oqaaseqatigiiliornernillu iluarsaanermut nukippassuit ullut tamaasa atortarpavut, piffissarlu taamatut atortagarput, suliatta imarisaanut atorusunnerugaluaqaarput, Mikkel Bjarnø Lund oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.