Innaarsuit: Tusagassiorfiit nunarsuarmit tamaneersut malinnaasut
Innaarsunni iluliarsuaq, aseroruni tassaarsuarneqarnermik kinguneqartitsisinnaasoq, pillugu nutaarsiassaq nunat tamalaat nutaarsiassaqartitsiviinit, ilaatigut BBC-mit, CNN-imit, Le Parisienimit, Washington Postimit, Associated Pressimit Canadamilu naggueqatitta tv-qarfiannit CBC northimit sapaatit akunnerata naanerani allaaserineqarpoq.
Innaarsuit taassumalu eqqaani nunaqarfinni aqutsisut siulittaasuat Karl Petersen iluliarsuup Innaarsunnut qanillinerata ulorinartorsiortitsinnaaneratalu eqqumaffigineqarnissaa pillugu allaaserisaqarami, sivitsunngitsoq attavigineqaqattaalerpoq.
- Mobiliga aqagukkut ullaakkut takugakku, normut nunanit allaninngaanneersut arfineq-pingasut uagut nalunaaqutarput malillugu pingasunngulerneraninngaanniit arfininngulerneranut sianeqattarsimapput, Karl Petersen oqarpoq.
KNR nunat tamalaat tusagassiuutaannit aamma attavigineqartarpoq.
- Nunatsinni pisumik nunarsuaq tamakkerlugu taama soqutiginnittoqartiginera uanga maani KNR-imiitillunga aatsaavissuaq misigivara, KNR-ip nutaarsiassaqartitsiviani aaqqissuisoq Arnaq Nielsen oqarpoq, nangillunilu.
- Nunarsuaq tamakkiivillugu taavalu nunanit tamalaanit nutaarsiassaqartitsivinninngaanniit massakkut saaffigineqartajaarpugut.
AAMMA ATUARUK Amerlasuut angerlarsimaffimminnut utersinnaalersut
Nunaniillu allanit soqutiginnittoqarnera KNR-ip nutaarsiassaqartitsiviata Youtubekkut kanaliani takuneqarsinnaavoq.
- Innaarsunni iluliarsuamik aserortumik videoliaq inunnit ikinnerpaamik 300.000-init Youtubekkut isiginnaarneqarsimasoq maluginiarparput, KNR-ip nittartagalerisua, Martin Chemnitz oqarpoq.
- Aatsaat taama amerlatigipput.
AAMMA ATUARUK Iluliarujussuaq allakkut aniffissaqanngilaq
Karl Petersenip iluliarsuaq pillugu allaaserisami qisuariarfigineqarnissaaa neriuutigisimavaa. Nunaniilli tamalaanit taama soqutigineqartiginissaa takorluunngikkaluarpaa, qaninnerusunummi apuussiniaraluarpoq.
- KNR-imit kiisalu Avannaata Kommuniani upalungaarsimanermut suliaqartunit pisussaq sioqqullugu qanoq qisuariartoqarnissaa uannut taanna isumaqarnikuuvoq, Karl Petersen oqarpoq.
