Takornariaqarnermik ingerlatsisunut minnerusut matunerannik kinguneqarsinnaasoq
- Sumiiffinni takornariaqarnermik ingerlatsisut ilaat matunissaannik kinguneqarsinnaavoq, pingaartumik maani tamanna nalaatissagipput qularutiginngilara.
Ilulissani takornariaqartitsinermi siunnersuisoqatigiit siulittaasuat, Arne Niemann oqarpoq.
AAMMA ATUARUK Vittus Qujaukitsoq: Aappaagu amigartooruteqarnissaq pinngitsoortinneqarsinnaanngilaq
Aningaasaqarnermut naalakkersuisup, aappaagumut aningaasanut inatsisissatut siunnersuut saqqummiummagu, takornarialerisut tusarluarpallaanngillat.
Nunatta karsianut isertitat iluanaarutillu amigaataasut
-
Naalakkersuisut angallannermut pitsanngorsaanermi inuussutissarsiutinullu ikiorsiissutinut katillugu 265 millionit koruuninik aningaasartuuteqarnissartik naatsorsuutigaat.
-
Namminersorlutik Oqartussat pigisaannit ingerlatseqatigiiffinnit ilunaarutinit 80 millionit koruunit amigaataanissaat naatsorsuutigineqarpoq.
-
Aalisarnermit 125 millionit koruuninik isertitakinnerunissaq naatsorsuutigineqarpoq.
-
25 millionit koruunit missaannik akileraarutinit isertitakinnerunissaq aamma naatsorsuutigineqarpoq.
-
Naalakkersuisut Mittarfeqarfinnit isertitanit 100 millionit koruuninik amigaateqarnissaq aamma naatsorsuutigaat.
-
Coronap ilungersunartorsiortitsinera pissutigalugu aningaasartuutit maannamut katillugit 595 millionit koruuniupput.
Taamaaginnarnissaanullu inuussutissarsiornermut ikiorsiissutit septembarip ulluisa 30-anni qaangiuttussat sivitsorneqannginnissaat pisariaqarpoq. Taamaaginnarnissaanullu aamma Namminersorlutik Oqartussat pigisaannut ingerlatseqatigiiffinnut coronamut attuumassuteqartunut aningaasaatinit aningaasaliissuteqartoqannginnissaa piumasaqaataavoq.
Coronap ilungersunartorsiortitsilerneraniit maannamut 595 millioner koruuninik nunatta karsianit aappagu aningaasartuutaasussanngorput.
Ikiorsiissutillu sivitsorneqanngippata aappaagumut aningaasartuutissat amerliartuinnassallutik.
Tassami inuussutissarsiortunut ikiorsiissutit septembarip 30-ani killeqartut sivitsorneqarnavianngitsut, naalakkersuisup saqqummiinermini oqaatigaa. Nutaamillu ikiorsiissutiliortoqaqqinnavianngitsoq, ilanngullugu oqaatigalugu.
Takornariaqarnermi tapersiisoqarnissaa suli pisariaqartoq
Takornarialerisunut ikiorsiissutit septembarip kingorna aamma atorfissaqartinneqaraluartut, Arne Niemann oqarpoq.
Aasaanerani takornariaqarnerpaasartoq, Arne Niemann oqaluttuarpoq. Takornariaqarluarneratalu nalaani aningaasat isertittakkatik, ukiup atatsip ingerlanerani aningaasartuutissanut matussusiisartut, taassuma ilanngullugu oqaatigaa.
- Aasaanerani isertittakkagut, ukioq manna isertinngitsoorpagut. Taamaammat ikiorsiissutit ingerlatiinnarneqarnissaat pisariaqarpoq, Arne Niemann oqarpoq.
AAMMA ATUARUK Coronaqarnerani ikiorsiissutit septembarimi atorunnaassasut
Takornarialerisut ikiorsiissutinik pissarsisinnaajunnaarpata takornarialerisunut annertuumik kingunerlussinnaasoq, taanna oqarpoq.
- Takusinnaasakka naapertorlugit, takornariaqarnermi ingerlatsisut minnerusut matunerannik kinguneqarsinnaavoq. Takornariaqarnermilli ingerlatsisut annersut nunatta avataaneersut, taakku aniguisinnaassapput. Taamaalilluni nunatsinni takornarialerinermi ingerlatsisut inuussutissaarutissapput.
Ikiorsiissutit sivitsorneqarnissaat neriuutigineqarsinnaasoq
Aningaasanut inatsisissatut siunnersuut aatsaat saqqummiunneqarpoq, taamaammallu ikiorsiissutinut tunngatillugu sivitsuisoqarsinnaanissaa suli neriuutigineqarsinnaavoq.
Ikiorsiissutinut qinnuteqarsinnaanerup sivitsorneqarsinnaanissaa Inatsisartuni aningasaqarnermut akileraartarnermullu ataatsimiititaliamiit naalakkersuisuniillu sivitsorneqarsinnaanissaat misissorniaraat, inuussutissarsiornermut naalakkersuisoqarfiup KNR-imut mailikkut ilisimatitsissutigaa.
Tassungalu isumaqataalluni, Arne Niemann isumaqatiginninniartoqarnissaanik noqqaassuteqarpoq:
- Takornarialerisut, akunnittarfiit tamarmiunngikkaluit, ikiorsiissutinik aappaagumut marsip tungaanut ikiorneqarsinnaanissaat kaammattuutigerusuppara, neriuppungalu taamanikkussamut nualluummut akiuussummik kapitittoqarsinnaalersimassasoq. Nunatsinni takornarialerisut pigiinnassagutsigit taamaaliornissaq pisariaqarpoq. Aningaasarsiuteqartinnata ingerlasinnaanngilagut. Taamaalioriaannaanngilagullu.